Qezaya Nisêbînê Mêrdînî de 14ê adara 2016î de qedexeyê tebervejîyayîşê kuçeyan ame îlankerdene û hêrişê dewlete  de nêzdîyê 80 kesandinyaya xo bedilnaye. Cenazeyê xeylêk kesan hema zî goristanê bêkesan de yê û keyeyî semedê cenazeyan şinê dozgerîya Nisêbîn û Mêrdînî nimûneyê gonî danê.

Tay cenzeyî ameyî girewten la hema zî nêzdîyê 40 cenazeyî goristanê bêkesan de yê. Cenazeyê hemwelatijanê ke dewlete qetil kerd erşawîyayî şarsitananê dormeyî sey Riha, Meletî û Dîlok. Cenazeyê ke înşaatê TOKÎyî de ameyî vetene zî erşawîyayî Stenbol.

Zafê nê keyeyan 4 serrî yo xeylêk rey Serdozgerîya Komare ya Nisêbîn û Mêrdînî de nimûneyê gonî dayî. Reyna tay keyeyan ke muracatê ÎHDyî Mêrdînî kerd, nê prosesî de 4 rey nimûneyê gonî dayî. Dosyayê mabêne dozgerîyê Nisêbîn û Mêrdînî de şîyî û ameyî, muracatê înan nêameyî qebulkerdene û Serdozgerîya Komare ya Mêrdînî vat babete girêdayê înan nîya û erşawitî dozgerîya qeza.

Keyeyê Abdulselam Degerî yo YPSyîjî (Kendal Qoser) nê keyeyan ra yew o. Dayîka Degerî Leyla Deger (47) ard ziwan ke 4 serî yo seba cenazeya lajê xo 3 rey nimûneyê gonî dayo Serdozgerîya Komare ya Mêrdînî la qet  averşîyayîş çin o. Leyla Deger va: ''Heqê qet kesî çin o wina dej bido ma anetene. 4 serrî yo ez seba esteyê lajê xo têkoşîn kena. Heta esteyê ey nêvînî rehetî mi rê çin a. Ez do heta nefesê xo yê peyênî têkoşîn bikerê. Ma dayîkî zaf çî nêwazenê, cenazayanê xo wazenê. Ma no dej heq nêkerd.''