Şarê Başûrî hetêkê Cengê Heftanînî yo. Beno ke ê rîyê tewr masumî yê nê cengî yê. Dewa Evlehe warê Pîrbûa yê Heftanînî de, binê Girê Koordîne de ya.  Îşxalkeran d hewteyî verê cû Girê Koordîne da bombayan ver û dima zî leşkerê xo tede ca kerdî. La derbanê gerîlayan ra leşkerê îşxalkerî nêeşkenê aver şorê. Dişmenî zî hêrişan dewijan kenê.

Ma dewa Evlehe de çayê dadîyêke şimit. Keyeyê na dadîye ser o bombayî ameybê varnayane. Dadîye vat: ''Nê koyî ê înan nîyê, senî tede manenê? Her roje awa înan zî pê helîkopteran erşawîyena ci. Pê zorî nê koyan de manenê. Nê koyî ê ma yê. Ma nêeşkenê dewa xo ra vejîyê. çend rojî verê cû Hukmatê Başûrî ame. Vanê 'serê sibayî şorê awe bidê baçeyanê xo la şan şorê cayêkê bînî.' Tirkan înan rê wina vato. Ma baxçeyê xo virazenê, keyeyê xo virazenê la ê zî şan nînan danê bombayan ver.

Bi serran o ke nê cayan ser o bombayan varnenê, helîkopterê kobra her şewe serê ma de gêrenê. Dewleta tirke rojêke zî aramî nêdaye ma. Hema zî wina kena. Gelo dinya nê kerdişê tirkan nêvînena? Kurdî wextanê tewr zehmetan de cayê înan de bîyî la nika çira bêveng ê? Ê do nê koyan ra şorê, çunke nê koyî koyê ma yê. Ê do şorê ma nê.''