Şubeyê Amedî yê Komeleya Huqûqnasan a Seba Azadîye (OHD) derheqê goranê Şêx Dewdada, Milkê Seray û Kinyata Farqînî de ke ameybî rijnayene, raporêk amade kerd. OHDyî raporê xo weşana.

Rapor de nê çîyî ameyî vatene:

''Dewa Şêx Dewdada de cendirmeyan venga muxtar Mehmet Orselendîyî da ke wa şoro qeraqol. Orselendî wexto ke şîyo qeraqol fermandarê qereqolî ci rê heqaret kerd û gef wend. Fermandarî ard ziwan ke kerrayanê goranê 2 lajanê ey ê şehîdan de nuşteyê qedexeyî estê. Fermandarî Orselendîyî ra waşt ke wa kerrayan bişikno û pê whatsappî fotografanê ci fermandarî ra bierşawo û eke ney nêkero ê do bi xo bikerê. Tedaya qeraqolî ra keyeyî kerrayî şikitî û dîmenî şawitî.

Dewa Milkê Serayî de zî fermandarê qeraqolî venga Mehmet Yenîyî da û ci rê vat ke kerraya gorê lajê xo bişikno û înan rê fotografan bierşawo. Mehmet Yenîyî îfade kerd ke nê serebûtî ra verê cû walîtîye ci rê telefon kerd û ci ra waşt ke wa tewrê keyeyanê verê bînaya HDPyî bibo. Seba ke Yenîyî na teda qebul nêkerd ame waştene ke kerraya gorê lajê xo bişikno.

Taxa Tekelî de zî sibata 2020î de asayîşî Ridvan Yilmaz û Kerem Yilmazî rê telefon kerd û vat ke ganî ê kerrayê goranê meridmanê xo bişiknê. Yilmazî pare kerd ke wexto ke şewe o şîyo goran ser dî ke kerrayê gorî ameyê şiknayene.''

Rapor de yeno eşkerakerdene eke heyetî Serdozgerîya Komare ya Farqînî Selçuk Dadakî reyde pêvînayîş kerd û Dadakî ard ziwan ke no tehqîqat hetê ey ra dîya destpêkerdene, goran ser o nameyê qodî û sembolê rêxistine estê û nê zî yenê manaya propagandaya rêxistine.

Rapor de ame vatene ke Dozger Dadakî waşt ke ganî nê nuşteyî bêrê pakkerdene yan zî kerrayê goran bêrê şiknayene.