Endamê Konseya Rayberdişî ya KCKyî Sabrî Okî bernameyê taybetî yê Stêrk TVyî de rojdem ercna. Qiseykerdişê Okî ra beşêk wina yo:

''Dima ke vera Rayberê ma Komployo Mîyanneteweyî ame kerdene ame waştene ke partîya ma bêra tasfîyekerdene. Heta 2004î nê xîretê tasfîye dewam kerd. Rayber Apoyî cuya xo ya zîndanî sey 'rojbîyayîşê min o hîrêyîn' pênase kerd û zîndan de paradîgmaya xo ya newîye awan kerde. Semedo ke na paradîgma mîyanê kadroyan û partîye de bêra famkerdene 4 serrî ma xîret kerd. Dima 1ê Hezîrana 2004î de prosesêkê neweyî dest pêkerd. Prosesê 1ê Hezîrane ma rê ruh û gan bi. 14ê nîsana 2009î de zî vera KCKyî operasyonî ameyî kerdene. Nê esasî ser o 1ê Hezîrana 2010î de  partîya ma û têgêrayîşê ma rewşe ercnaye û îfade kerd ke warê leşkerî û sîyasî de stratejîyêka newîye, hemleyêka newîye û cewabêko radîkal hewce yo. Nê esasî ser o 1ê Hezîrana 2010î warê leşkerî û sîyasî de stratejîyêka geşkerdişê xoverdayîş û serewedaritişî bîye. Hemleya 1ê Hezîrane de israr xet, rêxistin û îdeolojîya partî de israr o. Xoverdayîş, têkoşîn û serewedaritişê şarê ma, hêzê xo Hemleya 1ê Hezîrane ra gênê. Serewedaritişê şarê ma û ê gerîlayan bingeyê xo na hemle ra gênê.

Nika Başûrê Kurdîstanî de Zap, Avaşîn û Metîna de aşmêke ra nata îşxal esto. Darî birîyenê, dewî yenê vengkerdene, şar kişîyeno, birîndar beno. Tay kesan ra ber hukmatê Herêma Kurdîstanî ra vera nê îşxalî vengêk nêvejîyeno. Ma sey têgêrayîş, partîye û KCKyî vera serwerîya Başûrê Kurdîstanî nîyê la dewleta tirke vera ci ya. Dewleta tirke Başûrî îşxal kena la tay kesî vanê 'Tirkîya û PKK seyci yê' Merdim vano însaf!

Laj û cinîyan ê ciwanan ê PKKyî vera DAÎŞî bi ruhêkî fedayî Şingal, Rojawan û Başûrê Kurdîstanî de şer kerd şehîd bîyî. Nika heman gerîlayê ciwanî vera Tirkîya xo ver danê û şehîd benê. Senî Tirkîya û PKK seyci benê? Gereka hukmatê Başûrî vera dewleta tirke tewirê xo eşkera û rşat bikero. Nê hukmatî vizêr nê perey zî çalakîya mertalê gandarî asteng kerd. Başûr 24 saetan dîyeno bombayan ver. Sebebê ney PKK yo?  PKKyî ra verî qey dewleta tirke qet hêrişê Başûrî nêkerdo? Ma venga şarê xo danê ke wa vera nê vateyan vajo 'PKK ruhêkê fedayî, rûmetînî û xoverdayîşêkê fîrazî temsîl keno.'

Çend rojî yo gerîlayî bi hawayêkê bêhempayî xo ver danê, îşxalkerî nêeşkenê debikewê mewzîyan, tunelanê gerîlayan. Ganî şarê ma paştî bido nê xoverdayîşî. Wa şarê ma yê Başûrî wurzo payan ser. Vera gerîlayan gazê kîmyewî şuxilîyenê, şarê ma senî pê ney daymîş beno? Eke şarê ma û hukmatê Başûrî tewirê xo hol bimojnê Tirkîya nêeşkena hêriş bikera. Ganî roşnvîr, sîyasetmedar, hunermend û şarê ma xo rêxistin bikerê û tewirê xo bimojnê. Xora PKK do milê xo nêaro war, têkoşîn bikero. Peynîya nê zehmetîyan de do ma ser bikewê.

Çîyê ke Sedat Peker ano ziwan girîng ê. Ne çete û mafyayî vera têkoşînê kurdan û seba tasfîyeya PKKyî hetê dewlete ra ronîyayî û nika zî şuxilîyenê. Xora îqtîdarê AKP-MHPyî binê nê pîsîyan û lêşinîyan de nêeşkeno dewam bikero. Peynîya înan ameya. 

Dewleta tirke tim paştî daye DAÎŞ û El Nûsra û hema zî dana. Seke Pekerî zî îtîraf kerd dewlete nînan rê çekî erşawitî. Ganî huqûqo mîyanneteweyî dewleta tirke ra hesabê ney biperso. Pê paştdayîşê dewleta tirke DAÎŞî û nê cergan bi seyan kurdî, êzidîyî, sûryanî, erebî kiştî. Xora Amerîka û Rûsya zanenê ke dewleta tirke se kerd û paştî daya DAÎŞî. La ganî rayaumûmîya demokratîke Rûsya û Amerîka rê teda bikera ke dewleta tirke ra hesab bipersê. Dewleta tirke senî ke Rojawan de nê cergî ca kerdî nika zî Başûrê Kurdîstanî de heman çi kena. 

Tirkîya de pêro darbeyî a raşte vera têgêrayîşanê kurdan, muxalîfan û çepgîrana ameyî kerdene. Tarîxê Komara Tirkîya de cara tim darbeyî estê. Nika AKP-MHP bîyê dewlete û nînan her ca de, pêro dezgehan de xo rêxistin kerd. No îqtîdar zî tedaya muxalefetî keno, verê pêro nêrazîbîyayîşanê şarî gêno. La hînî se kenê bikerê zî peynîya înan ameya. Çunke têkilîya înan a pîse bi narkotîk û mafya eşkera bîye. Pê xoverdayîşê şarê kurdî no îqtîdar do şoro.

Rojawan de Îdareyê Xoserî aya raşte kerde û tewrê weçînayîşî nêbi. Xora weçînayîşê rejîmê Baasî qetî demokratîk nîyê. No weçînayîş zî çîyêkî ra çare nêbeno, eqsê ci mesele û alozîyî zêdîyayî. Ganî rejîmê Şamî bêro rayîrê raştikênî ser û Îdareyê Xoserî reyde Sûrîyeya demokratîke awan bikero. ''