Endamê Konseya Rayberdişî ya KCKyî Sabrî Okî Stêrk TVyî de rojdem ercna. Okî serê de şexsê şehîdanê menga gulane de heme şehîdî yad kerdî û derheqê hêrişê îşxalî yê peyêne de nê vatî:

''Nê hêrişê verênî nîyê. 1983 ra nata dewleta tirke hêriş kena. 2014 de ''Planê Çokdayîşî'' kewt dewre. Senî ke konseptê ke Srî Lanka vera Tamîlan kerde no plan ame kerdene. Goreyê nê planî herêmê gerîlayan do tim bêrê bombardumankerdene, şaro sîvîl tîya ra bêro vetene û tewr peynî şuxulnayîşê çekenê kimyewî esto. Seba ke dewleta tirke hêrişê vera Garê de ser nêkewt hêrişêko newe amade kerd. Xora ma texmîn kerdêne ke îqtîdaro faşîst ê AKP-MHPyî do hêrişê newe bikero. Vera Zap, Metîna û Avaşîn hêrişo hîra dîya destpêkerdene. Amancê hêrişanê îşxalîyê vera Zap, Metîna û Avaşînî oyo ke Vakur û Başûrê Kurdîstanî yewbînan ra raqilnê, şarê sîvîlî herême ra vejê û Herêmanê Pawitişî yê Medya parçe bikerê.

Nê hêrişî pê paştdayîşê hêzanê mîyanneteweyî yenê kerdene. Serra 1990 de erkanê pêroyî yê Tirkîya ê dewrî Dogan Gureşî badê zîyaretê Îngîlîstanî vat 'ma destûr girewt, ma eşkenê vera PKKyî her çîyî bikerê' û dima ra wayîrê karî, rojnameger, welatperwer bi hezaran kurdî ameyî qetilkerdene. Nika zî pê destûra winayêne dest pê hêrişî kerd. Zere de zî hukmatê Iraqî bêveng mend û  hêriş tesdîq kerd. Xora Hukmatê Başûrî û PKD eşkera mîyanê ci de yê.''

Okî vist vîrî ke hêrişanê peyênan dewleta tirke çeteyanê DAÎŞ û El Nusra zî şuxulnena û vat: ''Wezîrê Karanê Teberî yê Tirkîya Soylu vat 'sey Sûrîye amancê ma Iraq de zî mendiş o' rixmo ke selahîyetdarê dewleta tirke eşkera vanê ke ê sey Rojawanî wazenê Başûr zî îşxal bikerê Iraq bêveng o. 24 saete herra înan yena bombardumankerdene vera ci vengê xo nêvejenê. Iraqo ke semedê Şingalî tim vano yewîya herre, yewna dewlete yena herra ci îşxal kena. Qey vera nê hêrişî bêveng ê?''

Endamê Konseya Rayberdişî ya KCKyî Sabrî Okî semedê vergirewtişê hêrişê îşxalî yê vera Başûrî veng da îdarekaranê Başûrê Kurdîstanî, Iraq û Îranî û vat dewleta tirke bevêngîya dewletanê herême ra hêz gena. Okî wina veng da îdareyê Başûrê Kurdîstanî: ''Rojhelatê Mîyanênî de têna PKK eşkeno vera hêrişanê dewlta tirke xover bido û şer bikero. Ma fehm kenê şima nêeşkenê vera dewleta tirke şer bikerê. Şarê Başûrî ke vera hêrişan vejîyeno protesto keno ci rê astengî mevejê. Hêzê Kurdîtanî temînatê Başûrê Kurdîstanî yê zî û ma zanê ke şar senî tira hes keno.''

Sabrî Okî seba ke PKK lîsteyê terorî de yo vera nayî nêrazîbîyayîş mojna û  veng da hêzanê rojhelatî. Bitaytbetî zî veng da Almanya, Îngîlîstan û Amerîka û vat: '' Şarê ma çalakîyanê terorî nêkeno. Şima qey morê terorîstî danê têkoşînê ci ro. Amerîka semedê hîrê embazanê ma (Cemîl Bayik, Murat Kariyilan û Duran Kalkan) vana terorîst ê. Xeyrê têkoşînê nê hîrê embazanê ma çeteyê DAÎŞî bin kewtî. Eke DAÎŞ bin nêkewtêne asayîşê welatanê Ewropa çînê bi. Almanya, Fransa û welatanê bînan semedê meseleya kurdî çi kerd ke PKK ci rê bi asteng? Meseleya kurdî meseleyêka sîyasîye ya. Dewleta tirke ewro çeteyanê xo Zap û Metîna de ca kena. Mesele PKK nê, îşxalê Başûrê Kurdîstanî yo. Coka şarê ma genî pê xoverdayîşê gerîlayan sereberz bo.''