Wekîlê DEM Partî yê Bedlîsî Huseyîn Olanî derheqê tecrîdê vera Rayberê Şarê Kurdî Abdullah Ocalanî de ANFyî rê qisey kerd.

Huseyîn Olanî vist vîrî ke nêzdîyê hîrê serrî yo Rayberê Şarê Kurdî ra xeberêke nêna girewtene û vat: ''Birêz Abdullah Ocalan seba ke meseleya kurdan nêra çareserkerdene yeno tecrîdkerdene. Çimeyê pêro meseleyanê Tirkîya şer û çaresernêkerdişê meseleya kurdan de israr o. Bloko faşîst û nîjadperest ê AKP-MHPyî seba ke tim îqtîdar de bimano polîtîkayanê şer, tecrîd û mîlîtarîzmî ano ca. Tecrîdo mutleq teyna Îmrali de ney vera pêro dezgehan û partîya kurdan yeno kerdene. Îqtîdar hol zaneno ke eke tecrîdê Îmraliyî sist bikero do vengê xo zî kêm bikero.''

Olanî dîyar kerd ke halê hazirî de têgêrayîşê kurda ra ber muxalefetêk çin o û bale ante zulmê zîndanan ser. Olanî vat: ''Kerdişê zîndanan nênê qebulkerdene. Hetêkî ra cezayê tepişteyan bi keyfî yenê dergkerdene, hetêkê bînî ra poşmanîye nînan rê yena ferzkerdene. Nê kerdişî vera rûmetê merdimatîye yê. Grevê vêşanîye yê tepişteyanê sîyasîyan roja 19. de yo. Ganî waştişê tepişteyan ê meşrûyî bêrê qebulkerdene. Ganî komel paştî bido nê grevê tepişteyan, mesuldarîya xo bîyaro ca ke grevê tepişteyan ser bikewo.''