Hemvervatoxê Komîsyonê Têkilîyanê Teberî yê HDPyî Hîşyar Ozsoyî îtîrafê lîderê mafya û serçeteyê dewleta tirke Sedat Pekerî û serebûtê peyênî Ajansê Mezopotamya rê ercnayî.

Ozsoyî pare kerd ke semedo ke nê îtîrafî zereyê îqtîdarî ra yenê hende bale ancenê û vat: ''Sey Pekerî xeylêk çeteyî hetê dewleta tirke ra yenê weyekerdene û bingeyê înan de dişmenîya kurdan esta. Têkilîya Sedat Pekerî ya bi Wezîrê Karanê Teberî têkilîyêka îstîsnayîye nîya. No pûçbîyayîş û îdîayî pêro dezgehanê dewlete de estê. Serranê 90an de dewleta tirke pê nê çeteyan û Hîzbullahî cînayetî kerdî. Dewlete tim nê çeteyî şuxilnayî.

Serê SADATî ra pê TIRan çekî erşawîyayî Sûrîye. Tapeyanê Musteşarê MÎTî Hakan Fîdanî de no eşkera bi. Dewlete nê çeteyan seba qirkerdişê kurdan şuxilnena. Ewro Peker pê meseleya Sûrîye Serekkomar û Wezîrê Karanê Zereyî rê gefan waneno. Ma ra ber qet yew partîya muxalafetî vera nê îdîayan tênêgêrena. Rojnameger Veyîs Ateşo ke HDPyî rê nêngî çînayêne camêrdêkî ra pê zorî xîret kerd ke 10 mîlyon dolar bigêro la çew nêşino ey destbend nêkeno.''

Ozsoyî da zanayene ke çeteyê ke dewleta tirke weye kerdî kiştoxan ber anê û qirkerdişê Denîze Poyraz zî pê destê nê kiştoxan ame kerdene. Ozsoyî vat: ''Embazanê ma polîsan rê vato ke ê yenê gefwerdene. Rixmê ney zî embaza ma kişîyaye û polîsan pê rehme kiştoxe destbend kerde. Nê hêrişî netîceyê polîtîkaya sîstematîke ya dewlet ê.  Ma hê bedelanê giranan danê. Ganî muxalefet nê çeteyan de têrî bibo. Eke wina bikero muxalefet do nefes bigêro.''