Namzedê HDP'yî yê hemşaredarîya Çewlîgî Hîşyar Ozsoy û Hatîce Kavrane hetê şarê Çewlîgî ra bi govendî ameyî peşwazîkerdene.

Namzedê qezayan û vernamzedê  bajarî  ya pîya xeylî hemwelatijî şîyê vera namzedanê xo. Namzedî Hîşyar Ozsoy û Hatîce Kavrane cayê teyareyanê Çewlîgî de bi coşî ameyî girewtene û  bi otobusê weçînitişî turê bajarî ra dima ravêrtî banê partî.

Vernîya banê partî de verî parlamenterê HDP’yî yê Çewlîgî Erdal Aydemîrî xitabê şarî kerd. Aydemîrî  xoverdayîşê grevê vêşanîye silam kerd û vat ke ganî Îdrîs Baluken, Selahattîn Demîrtaş û heme embazê înan cade serbest bêrî veradayene.

Bado zî namzede Hatîce Kavarane şarê silam kerd û vat ke ma tapûyê cenetî kesî nêdanê, ma semedê xizmetê şarê Çewlîgî tîya yê.

Hîşyar Ozsoy zî bale ante polîtîkaya hêrişkare ya îqîtîdarî ser û va: ’’ AKP seba ke weçînitişan qezenc bikero şaran cêser fîneno. La ma bi kesî pêrodayîş nêkenê. Ez ewro tîya ruhê 7’ê Hezîrene vînena.  Senî ke ma o wext  ewlado erjaye yê Çewlîgî Îdrîs Baluken bi weçînitişî qezenc kerd, ma do na rey zî weçînitiş de ser bikewê.’’

Hîşyar Ozsoyî şaredarîya Çewlîgî zî rexnê kerd û va: ‘‘ 25 serrî cuwa ver wexto ke ez wendakar bîya, kuçeyê Çewlîgî senî bî, ewro zî hewa wina yê. Şarê Çewlîgî wexto ke şino sandiq ser ganî reyna bifikrîyo.‘‘

Ozsoyî xoverdayîşê grevê veşanîye zî vist vîrî û vat ke peynî ra tewr peyî ê do ser bikewê.