Teyerayanê keşfî yê dewleta tirke ya îşxalkere vizêr saete 12.00 de merkezê Şingalî de rayîrê sûka kahanî de wesayîtêkê YBŞyî bombarduman kerdç Fermandarîya YBŞyî pê eşkerayîyêke da zanayene ke  hêriş de Fermandarê YBŞyî Seîd Hesen û birazîyê ci û şerwanê YBŞyî Îsa Xwedêda şehîd bîyî.

Koordînasyonê PAJKî derheqê şehadetanê Hesen û Xwedêdayî de eşkerayîyêke daye. Eşkerayîye wina ya:

''Fermandaro ercîyaye yê YBŞyî Seîd Hesen û embazê ci hêrişê namerdî yê dewleta tirke ya faşîste de şehîd bîyî. Nê şehadetan ma zaf qehirnayî. Seîd Heseno ke rayberanê şarê Şingalî ra yew bi, bi serran semedê azadîya Şingalî têkoşîn kerde û kede daye. Seîd Hesen pê welatperwerîya xo û tewirê xo yê yewîya kurdan hetê şarê Şingalî ra şinasîyayêne. Seîd Hesenî kerd ke şerê vera DAÎŞî de ciwanê êzidîyî seferber bibê, şarê Şingalî abigêrê warê xo û Şingal xoser bo. Şehadetê ey semedê şarê Şingalî û şarê kurdî şehadetêko pîl o. La ma zanenê ke ciwanê Şingalî do têkoşînê Seîd Hesenî rê dewam bikerê, milê xo verê qirker û kolonyalîstan de nêarê war û têkoşînê estbîyayîşê xo biresnê serfîrazî. Şarê ma yê êzidîyan do dişmenê kolonyalîstî ra hesab biperso.

Ma do çirey şerwamê azadîye û demokrasî, têkoşînêr Seîd Hesenî xo vîr a nêkerê. Sere de keyeyê ci ma pêro şarê êzidîyan rê, Meclîsanê Şarê Êzidxanî û PADÊ û şarê welatperwerî yê Kurdîstanî rê serweşîye wazenê. Ma soz danê ke heta ke hişmendîya qirkere erdê xo ra bivejê  do şarê xo bipawê, têkoşînê azadîye bivisnê serfîrazî.

Hema ke dejê Fermanê 73. teze yo şehadetê embaz Seîd Hesen û Îsa Xwedêdayî polîtîkayanê hêzan ê mîyanneteweyîyan ê vera êzidîyan eşkera kenê. Mesuldara verêne ya nê hêrişî Amerika û Neteweyê Yewbîyayeyî yê ke warê hewayî akenê. Îqtîdarê Erdogan-Bahçelî-soyluyî sucê şerî kenê. Şehadetê Seîd Hesenî bi zelalî înfaz o. Merkezê Şingalî de cînayetêk ame kerdene. Eke hesabê nê şehadetî nêro perskerdene no îtîfaqo faşîst ê Tirkîya do cînayetanê xo rê dewam bikero. Wa şarê ma yê Şingal, Vakur, Başûr, Rojawan û Rojhelatê Kurdîstanî û Ewropa hesabê nê qirkerdişî bipersê û erjanê kulturelan ê êzidîyan bipawê.

Eşkera yo ke no hêriş pê komplo û planêkê pîlî ame kerdene. Hêzê ke verê qirkerdişê êzidîyan Tirkîya rê akenê Amerîka û Almanya yê. Amerîka sey dewletêka NATOyî pêro kerdişan û sûcanê dewleta tirke tesdîq kena. Dewleta Almanya zî hem çarçewa menfaatanê xo de êzidîyan dana koçkerdene hem zî qaşo Ewropa de wayîrê êzidîyan vejîyena. Sere de ê Almanya êzidîyê Ewropa ganî cewabê nê qirkerdişî bidê. Heta ke nê dewletî vera Tirkîya bi hawayêkê zelalî tewir bigêrê wa şarê ma protesto û reaksîyonanê xo rê dewam bikero.

Hemkarê nê qirkerdişî PDK û Iraq ê ke semedê tasfîyeya YBŞ û YJŞyî û çinkerdişê xoserîya Şingalî Tirkîya reyde peymane viraşte. Xeta dişmenîya kurdan a PDKyî tewr zaf dişmenîya ci ya vera êzidîyan de xo mojnena ra. PDKyo ke wextê hêrişanê DAÎŞî de êzidîyî war verdî û rema nika zî paştî dano qirkerdişê êzidîyan. Îtîfaqê gemarinî yê nimiteyî ney eşkera kenê. Hetê bînî ra medyaya Tirkîya û PDKyî ya ke hêrişanê Tirkîya yê vera êzidîyan kena meşrû, êzidîyan hedef kena semedê armancanê gemarinan şuxilîyena. Bi na wesîle ma K24o ke weşananê xo de dişmenîya êzidîyan keno şermezar kenê.

Hêzê sîyasî yê Ewropa binkewtişê DAÎŞî ra nata projeyê demokratîkî, statuyê xoserîya Şingalî û Rojawanî qebul nêkenê û şerî kenê xorin. Rewşa winasêne Afganîstan de qewimîyena. Nêşinasnayîşê sîstemê Îdareyê Xoserî yê Rojawanî stratejîya dewamê qirkerdiş, talan, cînayet, rijnayîşî ya vera kurdan a. Dewleta Rûsya roja verêne Talîban şinasna û xo rê muxatab girewt. No vera kurdan, şaran û cinîyan komployo sîyasî yo. Ma nê tewirê ci ra semed Rûsya şermezar kenê. Hişmendîya ke Talîban sey îdareyê resmîyî qebul kerdo hişmendîya DAÎŞî ya. Ma venga pêro têgêrayîşanê cinîyan danê ke vera Rûsya tewirê xo bimojnê û paştî bidê cinîyan ê afganan.

Ma reyna hêrişanê qirkeran ê vera şaran û kulturan şermezar kenê. Ma xoverdayîşê êzidîyan ê vera qirkerdişî selam kenê. Ma şexsê Îsa Xwedêda, Bêrîvane Şengalî û babîyê ci Seîd Hesenî de pêro şehîdan bi rêzdarî selam kenê, verê vîrameyîşê înan de soz danê ke pê awanîya Êzidxanê xoser û azadî wezîfeyê xo yê rayberîye bîyarê ca.''