Hêzanê PDKyî 26ê temmuze de nêzdîyê dewa Bêxme ya qezaya Xelîfanî ya Başûrê Kurdîstanî de dormeyê komêka gerîlayanê HPGyî girewtbi. 18 rojî yo koma HPGyî ra xeberêke nêna girewtene. HPGyî 29 û 31ê temmuze de eşkerayîye dabî û waştbi ke PDK derheqê nê gerîlayan de agahîye bidê. Kome de nê gerîlayî estbîy; Erdal Aslan (Serwer Serhat), Ayhan Tatli (Wargeş Çevreş), Dijwar Berxwedan.

Keyeyê Mahmut Xelefî 9ê tebaxe de şi Hewlêr ke derheqê lajê xo de xebere bigêro. Babîyê  Xelefî Hesen Şerîf Xelef verê Berê Sînorî yê Semalka de amebi astengkerdene. Hesen Şerîf Xelefî venga PDK û selahîyetdaran dabi ke aqîbetê lajê ci ser o eşkerayîye bidê.

Feleke û Fatma Tatli semedo ke aqîbetê birayê xo gerîlayê HPGyî Ayhan Tatliyî bipersê şîyî Hewlêr la raştê gefanê Parastinî ameyî. Înan derheqê mesele de ANFyî rê qisey kerd.

Waya gerîlayê HPGyî Ayhan Tatliyî Feleke Tatli ard ziwan ke 18 rojî yo birayê înan pê destê PDKyî dîya vînîkerdene û vat: ''Ganî şarê Başûrî vera nê kerdişê PDKyî wurzo payan ser û PDK derheqê birayê mi û embazanê ci de eşkerayîye bido. Çira PDK wina ma rê dişmenîye keno?Ganî Mesûd Barzanî û selahîyetdaranê PDKyî derheqê rewşa nê gerîlayan de eşkerayîyêke bidê. Çira PDK hende bêveng o? Ma qetî birakûjî nêwazenê la PDK pê kayanê dişmenî wazeno gonîya ma birijno. Ma şîyî Hewlêr ke birayê xo ra xeberêke bigêrê. Uca de kesê bi nameyê Zinaro ke Parastinî ra bi ma rê vat 'Şorê, reyna merê tîya. Ez nika eşkena şima tepişa û nêerşawa Tirkîya.' Merkezê PArastinî de her kes bi hawayêkê xirabî nêzdîyê mi bi. Ma semedo ke birayê xo ra xebere bigêrê pabeyê keyfê PDKyî yê. Ez venga pêro partî û rêxistinanê Başûrî dana ke aqîbetê 3 gerîlayan bimusê. Wa şarê Başûrî hesabê ney keyeyê Barzanîyî ra biperso.''

Dadîya Gulgeşe Tatli û waya Ayhan Tatliyî Fatma Tatli zî pabeya ci ya ke PDK agahîyan bido. Kênaya Fatma Tarti Gulgeşe Tatli bi hawayêkê birîndarî amebî tepiştene. Fatma Tatli vat: ''Dima ke kênaya mi tepişîyaye leşkeran pê telefonî xebere daye mi. Semedo ke ma kênaya xo bîbînê ma şîyî Colemêrg. La ma ameyî astengkerdene. Mil, ling û paştîya kênaya mi birîndar bîyî. LA reyna zî erzîyaye zîndanî. Dima ma şîyî zîndan mi kênaya xo dîye, rewşa aye hol nîya û nêna dermankerdene. Nika zî kênaya mi surgunê Zîndanê Wanî ameye kerdene. Ez pê kênaya xo sereberz a, sereyê mi pê sereberz o. Ez seba aqîbetê birayê xo zî venga MEsûd Barzanî dana ke wa derheqê birayê mi û embazanê ey de agahîye bido. Ma dişmenê yewbînan nîyê. Ma kurd ê û gonîya ma yew a. Heta ke ma gerîlayan ra agahîye nêgêrê ma do nêvinderê.''