Hêrişê dewleta tirke yê vera çar perçeyanê Kurdîstanî dewam kenê. Vera naye xebata yewîbîyayîşê kurdan zî yena domnayene. 19ê gulana 2020î de 25 partî û têgêrayîşanê sîyasîyan ê kurdan Rojawan de kombîyayîşêk kerd û xebata xo ya yewîya neteweyîye kiriştê merheleyêka corêne.

Vakurê Kurdîstanî de zî rayberîya Yewîya Neteweyîye ya Kurdan Kongreya Komelê Demokratîkî (KCD) keno. Hemserekê KCDyî Berdan Ozturkî derheqê babete ANFyî rê qisey kerd.

Ozturkî vist vîrî ke hêrişê vera kurdan herêmkî nîyê û vat: ''Her cade kurdî raştê hêrişan yenê. Coka ganî pêroyîya Kurdîstan de yewîya neteweyîye bibo. No nîno no mana ke partîyê ke secîye fikiryenê wa bêrê têhet.  Beno ka partîyî wayîrê îdeolojîyanê cîya cîyayan ê. La kultur, ziwan û tarîxo hempar ma mecbur keno ke ma bêrê têhet. Hema yaroje Anqara de kurdêk seba ke kurdkî deyîre vate ame kiştene.  Ewro Rojhelatê Mîyanênî de ça beno wa bibo eke kurdêk/e vajo ez kurda û wayîrê ziwan, nasname û kulturê vejîyena raştê hêrişî yeno.

Ma sey KCDyî 2007 de dest pê xebata yewîya neteweyîye kerde. Eke heta ewro ma sernêkewtî berpirsîyarîya ma ya. HDP û DBP naye ra mesuldar nîyê.  Xebatî bi înîsîyatîfê kongreya ma yenê rayraberdene. Na babete de muxabatê hesabdayîş û rexnekerdişî ma yê.

Nê 5 serranê peyênan de zanayîşê yewîya neteweyîye ya kurdan de zafêr bîyo. Nê seran de kurdan prosesê referandûmî yê Başûrî, îşxalê Efrîn û Rojawanî rê şahîd bîyî. Kurdan fam kerd ke mesela partîyêke nîya.  Mesela kurdîye û erjê Kurdîstanî yê.  Mesela qeyûmî ke şaredarîyê xesp kerdî karê înan o verên hêrişê ziwanê kurdkî kenê. Ganî vera nê hêrişan kurdî yewbî û pîya têbigêrê. Xora eke kurdî yew bî Amerîke, Rusya û Îran zî nêeşkenê wina rehet têbigêrê. Şarê kurdî xo ra na babete de talîmat dano. Ya ma vateyê şarî kenê benê yew  ya zî şar cezaya ma dano.  Ganî ma hînî menfaatê partîyan nê xo caverdê û waştişê şarê xo bîyarê ca.''