Endamê Îdareyê KCKyî Huseyîn Dîcleyî ANFyî reyde qisey kerd û pare kerd ke faşîzmê AKP-MHPyî seba çinkerdişê estbîyayîşê kurdan û vilakerdişê rêxistinîya înan hêrişanê xo dewam kenê.

Qiseykedişê Dîcleyî ra beşêk wina yo:

''Faşîzmê Tirkîya wazeno hetê komelkî, rêxistinî û îradeyî ra kurdan çin bikero. Tirkîya her tim hêrişê kurdan kerd, têna wextê PKKyî de nê. Faşîstbîyayîşê sîstemê Tirkîya, kolonyalîzmê vera Kurdîstanî seba qirkerdişê kurdan o. Koalîsyonê AKP-MHP-Ergenekonî bi nê hawayî esto û estbîyayîşê xo dewam keno.

Warê sîyasî de, kuçeyan de, her ca de têkoşîn esto. Gerîlayî vera nînan têkoşîn kenê, mîyanê komelî de zî xoverdayîşêk esto. Şerêko giran û taybet yeno kerdene. Ganî tesîrê ci bêro şiknayene û zelalkerdene. Faşîzmê AKP-MHPyî çinkerdişê kurdan ser o, qedînayîşê estbîyayîşê kurdan ser o qerarêko stratejîk da û batalkerdişê wekilîya parlamenteran, destsernayîşê şaredarîyan, tepiştişê sîyasetmedaran, îşkenceyê zîndanan û teberî, hêrişê giranî na raştîye mojnenê.

Her ca de  nêrazîbîyayîşî estê la ganî armanc rijnayîşê rejîmê faşîstî bibo. Eke no çinbo mumkîn nîyo ke nêrazîbîyayîşî heqê hêrişanê faşîzmî ra bêrê. Sere de şarê kurdî, şarê Tirkîya faşîzm qebul nêkenê. 

Ganî çalakî û rêxistinîyêka winasêne bêrê kerdene ke gefê vera estbîyayîşê komelî werte ra bêro wedartene. Ganî sîyasîyê demokratî, ciwan û cinîyî pê na mesudarîye têbigêrê. 

Faşîzm hînî bi hawayêkê kifşî aseno. Hînî eşkera bi ke AKP-MHP qirkerdişê kurdan ra ber çîyêkê bînî nêkeno û qirkerdişê kurdan sey armancêkê stratejîkî da verê xo.

Sere de ciwanî ganî hêzê rayberî zêdêr têbigêrê û çalakîyan bikerê. Xoverdayîşêko winasên esto la ganî zêdêr vila bibo. Ganî xoverdayîş peynîya îqtîdarî bîyaro. No zaf girîng û manadar o. Ciwanê Kurdîstanî ganî her ca de bibê adir û xoverdayîş geş bikerê. Vera faşîzmî tewiro tewr meşrû xoverdayîş o. Dewletêka polîse de mumkîn nîyo ke tewirêkê xoverdayîşî bêro mojnayene. coka ganî xoverdayîş bêro xurtkerdene.''