Fermandaranê YJA-Starî Pelşîne Koçgirî cewab da persanê Medya Haber Tvyî û hêrişê îşxalî yê vera Herêmanê Pawitişî yê Medya ercnayî. Qiseykerdişê Pelşîne Koçgirî ra beşêk wina yo:

''Artêşa tirke ya îşxalkere vera xoverdayîşê gerîlayan de teng bîye coka gazê kîmyewî şuxilnena. Hem zî nêmeyê hêrişan de wina kena. Nînan warêk pê bi hezaran kesan girewt binê ablûqa la reyna zî pê îradeyê 7 kesan nêeşkîya. Peynî de nînan metodê bêexlaqî şuxilnayî. Artêşa tirke bi nê hawayî binkewtişê xo îlan kerd.

Nika Mamreşo, Girê Şehîd Serdar, Aris-Fari, Ciloyê Biçukî de xoverdayîş dewam keno. Artêşa tirke wazena herême de ca biba la a pê îradeyê gerîlayan nêeşkena. Ma nê 2 mengan de şaşî û kêmasîyê xo ercnayî, metodê xo kerdî xurtêr. Ma her aste de xo newe kenê û wina do cewabê hêrişan bidê. Hayîya gerîlayan pê mesuldarîyanê înan esta.

Şero ke nika Herêmanê Pawitişî yê Medya de nêzdîyê 2 mengî yo dewam keno prosesê fînalî yê Şerê Dinya yê 3. o ke merkezê ci Kurdîstan o. Ewro a roja ke ma bi hawayêkê topyekûnî wurzê payan ser, nê şerî her cayî ra vila bikerê. Wa kes nêvajo destê mi de çîyêk çin o. Ganî ma sey kurdan bibê wayîrê tewirêkê yewî.

Na babete de rolêko pîl keweno milê cinîyam. Asta gerîlayan ê cinîyan nê prosesê şerî de eşkera bîye. Gerîlayê cinîyî her warî de sîstem û artêşbîyayîşê xo mojnenê, çalakîyan û xoverdayîşê bêhempayî kenê.

No şer heman wextî de şero fînal ê azadîya cinîyan o. Tarîxê cinîyan û ê Kurdîstanî zaf manenê pê. Senî ke wexto ke babete cinîye biba nêzdîbîyayîşê sîstemê camêrdan vurîyenê wexto ke babete Kurdîstan zî biba hêzê sîstemî benê yew. Erdê Kurdîstanî tecawuzî reyde têrî yê. Vera nê tecawuzî 3 tewirî estê; ya ti do bêveng binana, ya ti tewra nê tewawuzî bena yan zî ti do  vera ci xo ver bida. Bêguman nika her kes do tewirê xo eşkera bikero.''