Pêramotişê cinîyan ê ciwanan de resimêk: Dayîka Şehîd Egîdî

Têkoşîne pê xêzkerdişê resimê Dayîke Xalîse pare kena ke dejê Amed, Dêrsim, Mêrdînî; Silêmanî, Hewlêr, Ranya û Helebçe de yeno hîskerdene. Têkoşîne sînorê îşxalî nas nêkerdî û pê resimêkî bîye hîsê mîlyonan cinîyan ê kurdan.

Cinîyanê Ciwanan ê Têkoşeran mabênê 14-19ê hezîrane de Çemçemal, Silêmanî û Helebçe de seba hunerê neweyî yê cinîyan ê ciwanan bivejê vernî pê şîarê ''Çimê cinîyan ê ciwanan de Cinîye û Kurdîstan'' pêramotişêk serûber kerd. Cinîyan ê Ciwanan ê Têkoşeran da zanayene ke pêramotiş dîyarîya Bariş Çakanî ame kerdene ke Çakan seba ke muzîkê kurdkî goştarî kerdêne ame kiştene. 

Pêramotiş de resimêk estbi ke bale her kesî antêne: No resim ê Dayîke Xalîse bi ke dadîya şehîd Egîdî ya.

Şehîd Egîd Îpek 2017 de Dêrsim de pêkewtişêk de şehîd bi. Aşma nîsane de dewleta tirke pê kargoyî mîyanê kutuyî de cenazaya Egîdî dadîyê ci rê erşawite. Komelê Kurdîstanî û pêro dinya no kerdişê dewleta tirke şermezar kerd û nêrazîbîyayîşê xo mojna.

Dayîke Xalîse wexto ke cenazaya lajê xo girewte vat: ''Ez pê Egîdê xo sereberz a. Egîd Egîdê Kurdîstanî yo.'' Dayîke Xalîse pê vatişê xo pê tewirê xo pêro Kurdîstanî ruhêkî ser o ard pêser. Cinîyêka ciwane ya Silêmanî ruh û zerrîya xo de dejê Dayîke Xalîse hîs kerd û resimê aye viraşt.

Têkoşîne 23 serre ya û Silêmanî ra ya, wendekara zanîngehî ya. 4 serran ra nata bi hawayêkê amatorî resiman virazena. Serebûtê Şehîd Egîdî ci rê zaf tesîr kerd û pê naskerdişê Dayîke Xalîse xemgîn bîye. Têkoşîne resimê Dayîke Xalîse rojêke de virazena û nameyê resimî kena 'Têkoşîn.'

Têkoşîne vana: ''Mi waşt ke cinîyê Başûrê Kurdîstanî hîkayeya Dayîke Xalîse ra ahagdar bibê. Çunke na hîkaye hîkayeya pêro cinîyan ê kurdan û dadîyan ê kurdan a.''

Têkoşîne seba pêramotişî Rêxistina Cinîyan ê Ciwanan ê Têkoşeran rê sipas kerd û vat: ''Hewce yo ke ma aktîvîteyanê winasênan bikerê ke cinîyê ciwanî yê jîhatî yê Başûrê Kurdîstanî xo nas bikerê.''