Pêrîya Dêrsimî de 2ê hezîrane de do weçînayîş bêro newekerdene. Partîya Demokrasîyî û Têdûştîye ya Şaran ( DEM Partî) xebatê weçînayîşî dayî destpêkerdene.

Wekîlê DEM Partî Salîha Aydeniz, Bêrîtane Guneş Altin, Hemşaredarê Bajarê Pîlî yê Wanî Abdullah Zeydan, Hemşaredarê Dêrsimî Bîrsene Orhan û xeylêk kesan dewê Pêrî zîyaret kerdî.

 Dewa Sorekî ke bi nameyê heyetî Abdullah Zeydanî qisey kerd. Zeydanî vist vîrî ke dêrsimijî tim vera neheqîye vejîyenê û vat: ''Ewro zî vera neheqîye bêvneg nêvindenê. Ma ewro tîya vînenê ke şaredarîya ke tîya 8 serrî yo ameya xespkerdene xizmetê şarî nêkena. Ma do 2ê hezîrane de tîya ser bikewê û texrîbatê qeyûmê 8 serran wedarê.''

Bêrîtane Guneş zî vat: ''Ma bi 78 şaredarîyan mojna pêrune ke; şima se kenê bikerê, qeyûm ca bikerê, ma bierzê zîndan, se beno wa bibo ma do peyser game meerzê. Ma do Pêrî de rijnayîşê qeyûmî vindarnê, şaredarîye newe ra înşa bikerê. Coka ma do ber bi ber bigêrê û her kesî rê qala paradîgmaya xo bikerê.

Salîha Aydeniz zî wina vat: ''Xora şima zanê ewro Dewaya Kobanê est a. Na dewa mojnena ke welat senî yeno îdarekerdene, senî destê çeteyan de yo. Ê embazanê ke pawitişê demokrasîyî kerd, ma rê têkoşîn mîras verda.''

Heyet badê xebatan ravîyart qezaya Depî ya Xarpêtî û şaredarî zîyaret kerde.