Vera hêrişê îşxalî yê dewleta tirke û hemkarîya PDKyî ya îşxalkeran nêrazîbîyayîşî zêdîyenê. Başûrê Kurdîstanî de xeylêk fermandarê pêşmergeyan û pêşmergeyê Dêrinî şerê mabênê kurdan red kenê.

Dewa Jîyanîşî ya Çelê ya Colemêrgî ra pêşmergeyanê verînan Lezgîn Yunden (70) û Bedel Bîngol (73) yê ke wextê rejîmê Sedamî de Başûrê Kurdîtanî de bi serran şer kerd veng da partî û rêxitinanê kurdan ke wa kayanê îşxalkeran a mexapîyê.

Lezgîn Yundenî bale ante ser ke ê wextê krîtîkî de dewa Jîyanîşî ra hendê 70 kesan semedê paştdayîşê şarê xo şîyî Başûrê Kurdîstanî û vat: ''Şarê ma Başûr de ameyêne qetilkerdene coka ma bi vazdayîşî şîyî hetkarîya ci. Bi serran ma pêşmergeyîya PDKyî kerde la nika PDKyî çekê xo dartî qicanê ma. Wina beno? Ma semedê hetkarî keyeyê xo qicê xo caverdayî şîyî la ê ewro se kenê, vera qicanê ma şer kenê. Ez sey pêşmergeyêkê verînî qetî nê qebul nêkena. Eke şarê ma yew mebo ma do çirey mexelisîyê. Wextê şerî nê wextê yewîya kurdan o. Sere de PDK ez venga heme partîyanê kurdan dana ke wa semedê yewîye bigurîyê û vera îşxalî bibê yew veng.''

Bedel Bîngolî zî ard vîrî ke o 1982 de şîyo Başûrê Kurdîstanî û semedê pawitişê destkewteyanê Kurdîstanî tewrê sefanê pêşmergeyan bîyo û vat: ''Ma semedê herra Kurdîstanî şer kerd. Mi Başûr û Rojhelatê Kurdîstanî de 9 serrî wezîfe kerd û sefanê verênan ê şerî de bîya. Hetê bînî ra zî semedê kiriştişê muhîmatî yew linga mi zî Vakur de bî. Hela ke vera Kurdîstanî hêriş yeno kerdene ganî heme kurdê  welatperwerî wayîrê herra xo vejîyê û vera hêrişî bipawê. Ewro Mesûd Barzanî pêşmergeyanê xo waranê gerîlayan de ca keno û wazeno hêrişê gerîlayan bikero. Ez sey pêşmergeyê verênî nayî şermezar kena. Ganî kurdî meseleyanê mabênê xo cade çareser bikerê û semedê yewîya neteweyîye bigurîyê.''