Fermandaranê Pêşmergeyanê Dêrinî ra Awat Qehremanî û sîyasetmedar Yasîn Elîyî ANFyî rê qisey kerd û da zanayene ke ganî PDK şerê zereyî yê kurdan ra xo dûrî bigêro.

Awat Qehremanî bale ante serebûtê 5ê hezîrane ser û vat: ''Ganî serebût hol bêro cigêrayene û çew binê tometî de nêmano. PDK zî hol zaneno ke no hêriş hewayî ra ameyo kerdene.''

Qehremanîyî ard ziwan ke dewleta tirke seba şerê zereyî yê kurdan xîret kena û vat: ''PDK ganî şerê zereyî yê kurdan ra xo dûrî bigêro. Vera nê şerî pêrp partî, roşnvîr û hunermendê kurdî wa veng bidê. PKK zî sey ma kurd o û heqê ci esto ke Başûr de têbigêro. Îfadeyê 'Dewleta tirke semedê PKKyî hêrişê Başûrî kena, wa PKK Başûrî ra şoro' zaf xelet o. Dewleta tirke dişmena pêro kurdan a. Ça de beno wa bibo a do hêrişê destkewteyanê kurdan bikera.Şerê zereyî yê kurdan de sere de PDK Başûr do zerarêkê pîlî bivîno.

Wexto ke ma koyan de şer kerdêne PKK û PDKyî peymanêke viraşte û vat PKK sere de Qendîl xeylêk cayanê Başûrî de do ca bibo. Ez nêzanena çira PDK pêro waştişanê dewleta tirke ano ca, no sîyasetêko xelet o û xizmetê tirkan o. Şerê zereyî yê kurdan do têna dewleta tirke rê fayde bikero. Ganî pêro kurdî vera şerêkê winasênî tewirê xo bimojnê û PDKyî şîyar bikerê. Sere de YNK, Goran, Yekgirtî û partîyê bînî yê Başûrî wa PDKyî şîyar bikerê.''

Sîyasetmedar Yasîn Elîyî zî no ercnayîş kerd: ''Nika serebûtê herême hetê sîyasetê tirkan ra yenê kerdene. Sebebê îşxalê Kurdîstanî PKK nîyo. Dewleta tirke nika pê baregeh û sîstemê xo Başûr de ca dana xo. Pêro dinya vera qirkerdişanê Tirkîya bêveng a. PDK keno ke pêşmergeyî vera gerîlayan şer bikerê. Dewleta tirke armanc kena ke di serrî pey wexto ke Peymana Lozanî biqedo Başûr daxîlê Tirkîya bikera.

Her kes zaneno ke ê pêşemergeyî hetê dewleta tirke ra ameyî qetilkerdene. Nê pêro provakasyonê dewleta tirke yê.  Ganî pêro kurdî, hunermend, roşnvîr û partîyê sîyasî yê Başûrî vera dewleta tirke û şerê zereyî yê kurdan tewir bigêrê. Dewleta tirke kena ke kurdî têvera şer bikerê û a zî çimeyanê kurdan ser o kolonyalê xo rona.

Ez venga her kesî dana ke no proses normal nîyo. No şe rmabênê PKK û dewleta tirke de nîyo. PKKyî dewleta tirke kerde qels, ma zî ganî aye Başûrî ra bivejê. Êyê ke bêveng ê îxanetê kurdan kenê.  Dewletanê Ewropa kişîyayîşê 5 pêşmergeyan eşt milê gerîlayan. Semedo ke ma bêveng ê dewleta tirke pê hetkarîya NATOyî şarê kurdî qir kena û Kurdîstanî îşxal kena. Wextê ci yo ke ma vera nê îşxalî wurzê payan ser.''