Endamê Komîteya Zîndanî ya PKKyî Pîro Dêrsimî bernameyê taybetî yê Radyoyê Dengê Welat de qala hêrişan ê faşîstan ê AKP-MHPyî, tesîrê ci yê vera zîndanan û têkoşînê vera faşîzmî kerde.

Qiseykerdişê Pîro Dêrsimî ra beşêk wina yo: 

''Hêzanê serweran prosesê janî xo rê kerd firsendêk. Merdimî keyeyê xo de ameyî hepskerdene. Bi nê hawayî dewlete mesaj da ke eke a esta eşkena hetkarîya to bikera. Prosesê janî de îqtîdarî xeylêk meseleyê ke komelî pê razî nêbîyêne meclîs de sey qanûn qebul kerd.

Her parçeyê Kurdîstanî de vera destkewteyanê şarê kurdî hêrişî estê, nê prosesî de qirkerdişî zêdîyayî. Rayber Apo û tepişteyê bînî terkê mergî bîyî. Reyna nê prosesî de vera cenazayan û goranê şehîdan hêrişî ameyî kerdene.

Fikro ke vano AKP pê weçînayîşî şino xafletêk o. Faşîzmê AKP-MHPyî pê weçînayîşî nê pê xoverdayîşî do şoro. Nika zî amadekarîya weçînayîşî yena kerdene. Nê hêzê faşîstî ancî do payan ser o bimanê.

Ganî vera faşîzmê îqtîdarî xeta xoverdayîşî bêra awankerdene. Ma nêeşkenê vajê Tirkîya de muxalafet çin o; esto a têkoşînê ci xelet o. HDPyî ra ber partîyêke zî muxalefetê raştikênî nêkena. Ganî şarê kurdî, gerîlayî, cinî û ciwanê Başûr, Vakur, Rojhelat û Rojawanî xo ver bidê. 

Zîndananê Xarpêt, Osmanîye, Tarsus, Şakran û zîndananê bînan de îşkenceyo sîstematîk esto. Vîrusî ra dima pêro heqê tepişteyan ameyî çinkerdene. Vîrus û jan hema zî estê. Zanayîşê zîndanan zelal nîyê. Hetê bînî ra qanûnê înfazî reyde cezayê dîsîplînî zêdîyayî û verê têgêrayîşan ê keyfîyan ê selahîyetdaran ame akerdene.

Pê qanûnê înfazî wazenê îradeyê tepişteyan bişiknê û înan teslîm bigêrê. La tepişteyê PKKyî nê tedayan qebul nêkenê. Ganî her zîndan rêxistina xo xurtêr bikerê. Tewiro hempar girîng o. Embazê ma yê tepişteyî wayîrê tecrubeyêkê pîlî yê. Hamleya 'Ma tecrîd bişiknê, faşîzm birijnê û Kurdîstan azad bikerê' de ma no xoverdayîş bi hawayêkê zelalî dî.

Ganî demokrat, şorişgêrî wayîrê tepişteyan ê şorişgêran bivejîyê. Ganî keyeyî rayberîya naye bikerê. Xîret esto la qîm nêkeno.

Ez venga baro, avûkat û rêxistinanê huqûqî dana ke wayîrê zîndanan bivejîyê. Ganî ma mesuldarîya xo ya seba tepişteyan ê sîyasîyan bîyarê ca. Eke her kes vera faşîzmî xetêka xoverdayîşî awan bikero ma do bivînê ke muxalefeto komelkî do bieşko faşîzm çin bikero.

Ma pê bawer ê ke zîndanan de xoverdayîşêko winasên do bêro kerdene. Nê esasî ser o ez selam û hûrmetê xo Rayber Apoyî û pêro embazanê tepişteyan rê erşawena.''