Komîteya Rayberdişî ya PKKyî bi wesîleya serrgêra Hamleya 15ê Tebaxe eşkerayîyêke daye.

Eşkerayîya PKKyî wina ya:

''Emser Hamleya 15ê Tebaxe dekewena serra 37. PKK, şarê kurdî û dostê ma esasê Hamleya 15ê Tebaxe û Xeta Serkewtişî ser xo ver danê î ser kewenê.

Ma serrgêra 36. ya Hamleya Gerîlayan a Şorişgêre ya 15ê Tebaxa 1984î ya ke bi rayberîya Rayber Apoyî hetê partîya ma PKKyî ra ameye afernayene, bi derbanê giranan ê gerîlayanê ma pêşwazî kenê. Ma sey şar û gerîlayan dest pê serra 37. ya 15ê Tebaxe, serra azadîye ya kurdan, serra newerabîyayîşî û xoverdayîşê çêrî yê azadîye, serra hamleyêka newîye û serkewtişî kenê. Nê esasê xoverdayîşê şar û gerîla, bi pîlkerdişê şerê şarî û şorişgêrî ma kewtî serrgêra 36. ya Hamleya 15ê Tebaxe ya fîraze.

Nê esasî ser o ma xoverdayîşê şar û gerîlayanê çêran rê selam kenê ke bi ruhê Hamleya 15ê Tebaxe û Serkewtişî yeno caardene. Ma 15ê Tebaxe yê şar, gerîla û dostanê xo fîraz kenê. Şexsê Fermandaran ê Bêmergan ê Hamleya 15ê Tebaxe Egîd û Zîlane de ma şehîdanê têkoşînê azadîye bi rêz, heskerdiş û mînetî yad kenê. Ma soz danê ke serra 37. ya hamle de ma wayîrê vîrameyîşanê înan vejîyê û armancanê înan bîyarê ca, ma do bi xurtî şer bikerê û serkewtişanê pîlan bivisnê destî. Serra 37. ya Azadîya Kurdan de ma her kesî rê serkewtiş wazenê ke seba azadî, têdûştî, edalet wayûbiratî û demokrasîyî têkoşîn kenê.

Çalakîyê Dih û Şemzînanî yê 15ê Tebaxa 1984î ke sey 'Guleyê Verênî' zanîyenê, seba tarîxê Kurdîstanî bîyî mîladêk. Bingeyê xoverdayîşê şar û gerîla de tarîxê azadî û estbîyayîşî yê kurdan dest pêkerd. Hamleya Şorişgêre ya 15ê Tebaxe têkoşînê 36 serran de raştîyêka şarî afernaye.

Bêguman hamleyêka winasêne bi asanî nêameye caardene. Bngeyê ney de dersê şorişgêrî yê raştikênî estê ke Rayber Apoyî têkoşînê azadîye yê bi hezaran serran ê kurdan ra vetî. Na hamleya azadîye bira tarîxî ser o ke Rayber Apoyî Newroza 1973î de daye, têgêrayîşê ciwanan ê şorişgêran ser o ke bi nameyê 'Şorişgêranê Kurdîstanî' Kurdîstan de vejîya meydan, xoverdayîşê tarîxî yê Hîlwan û Sêwrege ser o, binê şert û mercanê giranan de serranê 1980-1982î de ameye caardene û na hamle Xoverdayîşê Zîndanan ê Pîlî yê 1982î reyde aver şîye. Bira xoverdayîşî hetê şorişgêranê rayberan Mazlûm, Ferhat, Kemal, Hayrî û Sarayan ra ameye dayene. Na bira tarîxîye bi Hamleya 15ê Tebaxe bi destê gerîlayan resaye koyan û komelî.

Eşkera yo ke Hamleya Gerîlayan a Şorişgêre ya 15ê Tebaxa 1984î Vakurî ra dest pêkerde û çar parçeyanê Kurdîstanî de, teberê welatî de rixmê zor û xehmetîyan, bi bedelanê giranan vila bîye. Tay kesan vatêne 'Nêeşkenê 36 saetan zî xo ver bidê'. 36 serrî yo ke vera kolonyalîzmê TCyî yê faşîst û qirkerî şerêko bêmabên yeno caardene. Ma bin nêkewtî û Vakur, Rojawan û Başûrê Kurdîstanî de deskewteyî vistî destî. Naye ra wetêr ma xetêka xoverdayîşî afernaye ya bin nêkewte û bîye hêvîya azadîye.

Netîceyê şerê azadîye yê şorişgêrî werte de yê. 36 serrî yo ke binê her çîyanê Kurdîstanî de morê Hamleya 15ê Tebaxe esto. Her çî ra verî na hamle Kurdîstan û raştîya dinya û herême ronî kerde, raştîya Rayberêkî afernaye. Na raştîya Rayberîye ya ke şexsê Rayber Apoyî û şehîdan de z3il daye, bindestan û bi taybetî cinîyan rê rayîrî akerdî. Na raştîye rayberîya PKK û PAJKî de, HPG û YJA-Starî de KCK, KJK û Komelanê Ciwanan de estbîyayîşê xo aferna. Hamleya Gerîlayan a Şorişgêre ya 15ê Tebaxe Kurdîstan de Şorişê Newerabîyayîşî yê Neteweyî ard ca, Şorişê Azadîya Cinîyan da destpêkerdene, Başûrê Kurdîstanî de seba kurdan statuyêk aferna, Şorişê Azadîye yê Rojawanî ard ca. Destkewte û averşîyayîşê na hamle pîl, girîng û manadar ê.

PKK, Şarê Kurdî û dostê ma bi Hamleya 15ê Tebaxe û Xeta Serkewtişî xo ver danê û ser kewenê.Faşîzmê AKP-MHPyî yo ke rejîmê faşîst-leşkerî yê 12ê Êlule ra cêr nîyo, dişmenê serranê 1980î bi. Îdareyê faşîstî yê AKP-MHPyî Kurdîstan de qirkerdiş, kolonyalîzm û teror berdî asta tewr berze. Faşîzmê AKP-MHPyî yo ke hêrişê cinî, ciwan û domanan keno, wazeno rûmetê komelî çin bikero, seke rejîmê 12ê Êlule zîndanan de kerdêne, bi nê hawayî Kurdîstan de têgêreno.

Bêguman eke cayêk de zulm zêdîyena hînî xoverdayîşê azadî û demokrasîyî yê vera nê zulmî zî aver şino. Xora vera zulmê AKP-MHPyî rayberîya PKK û HBDHî de xoverdayîşo şorişgêr û topyekûnî yeno caardene. Hamleya 15ê Tebaxe vizêr rejîmê 12ê Êlule çin kerd û ewro zî rejîmê faşîstî yê AKP-MHPyî çin keno. 'Guleyê Verênî' ra heta 'Cengê Heftanînî' xoverdayîşê gerîlayan ê çêran , hêvî û xelisîyayîşê bindestan o. Çalakîyanê Dih û Şemzînanî ra heta şerê Serhed, Efrîn, Xakurkê û Heftanînî û xoverdayîşê Wanî ra heta Îstanbul û Ege her ca de têkoşînê azadî û demokrasîyî dewam keno û her roje derbanê giranan dano faşîzmê AKP-MHPyî ro.

Eşkera yo ke serra 37. ya Hamleya 15ê Tebaxe do sey 36 serranê bînan bi xoverdayîşê pîlî derbaz biba. Gerîlayî, xopawitiş, cinî, ciwan, sîyaseto demokratîk do xo ver bidê. No xoverdayîş Kurdîstanî ra heta Tirkîya, Rojhelatê Mîyanênî û dinya do vila bibo. No xoverdayîş do faşîzm çin bikero.

Nê esasî ser o ma Roşanê Gerîlayan ê 15ê Tebaxe yê Rayber Apoyî, pêro embazan, dostan û şarê xo fîraz kenê. Ma şehîdanê çêran yad kenê, serra 37. ya Hamle rê selam kenê. Ma venga hêzanê şorişgêr û demokratîkan danê ke Hamleya 15ê Tebaxe û Xeta Serkewtişî raşt fam bikerê, xo nê esasî ser o newe bikerê, serra 37. ya Hamle de bi ruhê 15ê Tebaxe û ruhê serkewtişî şer bikerê, rejîmê faşîstî çin bikerê. Ma ê kesan rê ke binê fermandarîya Egîd û Zîlane de şer kenê û xo ver danê serkewtiş wazenê.''