Komîteya Têkilîyanê Teberî ya PKKyî bi eşkerayîyêke pare kerd ke Îdareyê PDKyî û keyeyê Barzanîyan bi hemkarîya xo ya dewleta tirke îxanetê xo kirişto astêka berzêre. 

Eşkerayîye wina ya:

''Têgêrayîş û rayberîyê pîlî bi têkoşînê xo û terzê xo yê cuye; têgêrayîşê qijî zî bi bêkrîterîya xo û îxanetê xo tarîx de cagênê.

Îdareyê PDKyî vera şerê azadîye yê gerîlayanê Kurdîstanî hetê MÎT û artêşa tirke de cagêno. Hewlêr de merkezê koordînasyonî yo hempar ê pêşmerge û leşkeranê îşxalkeran, mabênê MÎT û Parastinî de zî Odaya Parekerdşê Îstîxbaratan ronîyayî. Wezîrê Karanê Teberî yê Tirkîya Hakan Fîdanî verê çapemenîye de çend reyî qalê na hemkarîye kerdbi. Sîteyanê artêşa tirke û Wezîrîya Karanê Teberî de xerîtayê qereqol û baregehanê Başûrî yê artêşa tirke est ê.

PDK û keyeyê Barzanîyan hol zanenê ke nê kerdişê înan îxanet ê. Nê seba ke na têkilîya gemarine rê mutefîqan bivînê zor danê YNK û Îdareyê Bexdadî ke bibê hemkarê dewleta tirke. Zîyaretê Bexdad û Hewlêrî yê Erdogan, Hakan Fîdan û Îbrahîm Kalinî parçeyê ney ê. Îdareyê PDKyî û keyeyê Barzanîyan îxanet kirişt astêka berzêre û kesê ke xayîn nîyê zî hetê PDKyî ra hedefê Tirkîya yenê kerdene.

Rojnameyê Xebate yê PDKyî 14ê gulane de bi sernameyê 'PKKyî Silêmanî de hêzê çekdarî awan kerdî û nînan şaweno Qendîl û Rojawanî'' Silêmanî û îdareyê ci kerdî hedefê dewleta tirke. PDK bi nê xeberan keno ke wa Tirkîya hêrişê Silêmanî bikera. PDK nika zî dewleta tirke reyde şar û îdareyê Silêmanî tehdît keno.

PDK zî, keyeyê Barzanîyan zî û rojnameyê Xebate zî hol zanenê ke Silêmanî de yew hêz yan zî rêxistinîya PKKyî çin o. No teyna zûrêke nîya; zûrêka qestî û plankerde ya.

PKK û gerîlayê azadîye yê Kurdîstanî verê hêrişanê dişmenî de seba pawitişê şar û erdê Kurdîstanî xizmet kenê. Seke 2014î ke wexto ke DAÎŞî hêrişê Hewlêr, Kerkûk, Mexmûrî û Şingalî kerdbî vengdayîşê hetkarî yê Mesûd Barzanîyî ser o gerîlayî herikîyayî uca.

Tarîx nê îxanetan qeyd keno. Îxanet bi vîyartişê wextî vîr a nêşino û rojêke tira hesab do bêro persayene.

Nê prosesê têkoşînî de PDK û keyeyê Barzanîyan îxanet de yew benê, dişmenê şarî benê û îxanet de israr kenê. PDKyî weçînayîşanê Vakurê Kurdîstanî de paştî daye blokê AKP-MHP-Huda Parî; Rojawan de paştî daye cerganê DAÎŞî û dewleta tirke; Başûr de rayîr dano îşxalî û vera gerîlayan têgêreno.

Rewşa objektîfe, sîyasî, leşkerî û raştîye ney a. Coka ganî hêverî na rewşe bêra çareserkerdene. Peygoşkerdiş, giranînêdayîşê na rewşe yenê manaya hemkarîya îxanetî.  Coka ma venga pêro partî, kurdîstanij, roşnvîr, dezgeh û hunermendanê Kurdîstanî danê ke vera îxanetê PDKyî û hemkarîya dewleta tirke û PDKyî vejîyê.''