Endamanê Tabûrê Bêmergan şehîd Rojhat Zîlan û şehîd Erdal Şahînî çalakîya xo ya fedayî ya Anqara ya 1ê teşrîna verêne ra verê cû roportajêk dabi. Gerîla TVyî qiseykerdişê wird şehîdan weşana.

Rojhat Zîlanî bi selamkerdişê embazanê xo yê gerîlayan dest pê qiseykerdişî kerd û vat: ''Wextêkê dergî ra nata ma pabeyê na çalakîya fedayî yê. Wextêkî ra nata ma prosesêkê giranî ra derbaz benê. Coka ganî gamê dîyarkerdeyî bierzîyê. Beno ka çalakîya ma do naye bikera. Ma wazenê nê prosesê giranî de erkê xo bikerê. Ma bi kêfweş û kelecanî yê. 

Warê xoverdayîşî de xeylêk embazê ma yê ciwanî est ê. Ma nînan ra hêz û moralî gênê, pê nînan bawerîya ma zêdîyena. Helbet şer çîyo asan nîyo la bawerî û îradeyê embazanê ma raştîya Rayberîye û têgêrayîşê ma yo. Bi na wesîle ma şexsê embazanê xo Baz Mordemî û Helbeste Koçerîn de pêro embazanê xo yê ke bi çekanê kîmyewîyan şehîd bîyê yad kenê. Şehadetê înan seba ma giran bîyî. Coka armancanê çalakîya ma ra yew zî qesasê înan o. Ma embazanê xo ra zî wazenê ke wa xo xurt bikerê, derbanê giranan bidê dişmenî ro. Bi taybetî çalakîyê bi serkêşîya YJA-Starî hêz û moralê pîlî danê ma. Ma pêro embazanê xo selam kenê, heskerdişanê xo pêşkêşê înan kenê. Ma pê embazanê xo sereberz ê. Ma bi zerrîasanî û bawerî ver bi serkewtişî şinê. Çimeyê ma pey de nêmanenê.''

Gerîla Rojhat Zîlanî bi slogananê ''Bijî Serok Apo", "Bijî PKK", "Bê Serok Jiyan Nabe" û "Jin, Jiyan, Azadî" qiseykerdişê xo qedîna.

Erdal Şahînî ard ziwan ke vera hêrişanê dewleta tirke gerîlayî xoverdayîşêkê pîlî kenê û vat: ''Ma wazenê bibê parçeyê nê xoverdayîşî. Ma wazenê bibê layîqê keda embazanê xo. Ma prosesêkê zaf giranî de yê. Seba azadîya Kurdîstanî, Rayberîye û şarê ma her ca warê xoverdayîşî yo. PKKyî bi hezaran reyî îsbat kerd ke bedelê ci çi beno wa bibo apey gamêke zî do nêerzîya. Pêro milîtanê PKKyî fedayî yê. Nê prosesî de sey şar û gerîlayan ganî ma zî erkanê xo bikerê. PKK têgêrayîşêkê qesasî yo. Ma armanc kenê ke azadîya Kurdîstanî û Rayberîye bîyarê ca. 

Çalakîyêka fedayî ya winayêne waştişê bi seyan embazanê ma yo. Ma zanenê ke bara ma giran a coka seba ke erkê xo bi layîqî bîyarê ca destê ma ra çi bêro ma do bikerê. Ma do bikerê ke qesasê embazanê xo yê şehîdan bigêrê. Wa dişmen hol bizano ke PKK do nêqedo. PKK dengizêk o. Ma zî wazenê ke bibê çilkêka nê dengizî. Ma bawer kenê ke çalakîya ma do ser bikewa. Ma embazanê xo ra teyna wazenê ke se beno wa bibo zerrîya dişmenî weş mekerê. Vera dişmenî tim xo bipawê. Her ca de wayîrê Rayberîye, têgêrayîşî, şarê ma vejîyê. Pêro embazê ma warê azadîye de bi fedakarîyêka pîle têkoşîn kenê. Ma înan selam kenê û heskerdişê xo pêşkêş kenê. Ma pêro embazan rê serkewtiş wazenê.''