Komîteya Rayberdişî ya PKKyî derheqê serrgêra 40. ya Xoverdayîşê Rojeyê Mergî yê Pîlî yê 14ê Temmuze de eşkerayîyêke daye. Eşkerayîye wina ya:

''Ma dest pê serra 40. ya Xoverdayîşê Rojeyê Mergî yê Pîlî yê 14ê Temmuze kenê. Têgêrayîşê Azadîye yê Kurdîstanî û şarê kurdî 39 serrî yo xeta 14ê Temmuze de têkoşînê rûmetî yê neteweyî kenê û ma ser kewenê. Tesîrê nê xoverdayîşê pîlî qetî kêm nêbeno, eqsê ci zêdîyeno. Kurdîstan de 39 serrî yo seba azadîye gamî erzîyenê, pê tesîrê Xoverdayîşê 14ê Temmuze yo. Eşkera yo ke serra 40. de no tesîr do pîlêr bibo û rayîrê serkewtişanê azadîye abikero.

Nê esasî ser o ma Xoverdayîşê 14ê Temmuze, ruhê ci yê serkewtişî, qerardarîya pîle ya 14ê Temmuze, çêrî û fedakarîya xo, hîşmendî, îradeyê xurtî, ferasetê heskerdişî  selam kenê. Ma Roja Rûmetê Neteweyî yê 14ê Temmuze ya Rayber Apoyî, şarê ma û embazanê ma fîraz kenê. Şexsê Mehmet hayrî Durmuş, Kemal Pîr, Akîf Yilmaz û Alî Çîçekî de pêro şehîdanê xo bi rêzdarî yad kenê. Ma îfade kenê ke serra 40. de her hetî de bi xurtî şer bikerê û serkewtişî bîyarê ca.

Xoverdayîşê Zîndanî yo Pîl vera rejîmê faşîst-leşkerî yê 12ê Êlule ame kerdene û pê çalakîya Newroze yê Mazlûm Doganî dest pêkerd. No xoverdayîşo pîl pê çalakîya tarîxî ya Çaran rayberîya Ferhat Kurtayî de ame kerdene. Dima ke embaz M. Hayrî Durmuş roja 14ê Temmuze îlan kerd, çalakîya Rojeyê Mergî yê Pîlî dest pêkerde û no xoverdayîş ser kewt. Şorişê Azadîye yê Kurdîstanî de xeta fedayî ya serkewtişî afeernaye. Rayber Apoyî semedê Xoverdayîşê 14ê Temmuze vatbi 'her aste de xeta ma ya partîye temsîl keno.'

Eşkera yo ma sey şar û têgêrayîşî 39 serrrî yo na xete ser o xo ver danê, têkoşîn kenê û ser kewenê. Destkewteyê ke nê 39 serran de ameyî destvistene, pê tesîrê Xoverdayîşê Rojeyê Mergî yê Pîlî yê. Vera rejîmê faşîst-leşkerî yê 12ê Êlule Rayberîya partîya ma xo rêxistin kerd, Hemleya Şorişgêre ya 15ê Tebaxa 1984î ard ca, serewedaritişanê 1990an dest pêkerd, têgêrayîşê cinîyan rayberîya embaze Sara de mîyanê Xoverdayîşê Zîndanan ê Pîlî de dest pêkerd. Xoverdayîşê 14ê Temmuze hertim û her ca de rayîrî nîşan keno, hêz dano û ser visneno.

Vera hêrişanê şerê taybetî yê qirkerdişî yê AKP-MHPyî Têgêrayîşê Azadîye yê Kurdîstanî, şarê kurdî û hêzê de mokrasî xeta 14ê Temmuze de xo ver danê û ser kewenê. Eke merdim bala xo bido vîneno ke dişmen dişmenê 39 serrî verî ra cîya nîyo. Faşîzmê AKP-MHPyî dewamê Cuntaya Kenan Evrenî yo. Sivîlbîyayîşê na darbe yo. Faşîzmê AKP-MHPyî semedo ke PKK tasfîye bikero, kurdan qir bikero û Kurdîstan îşxal bikero pêro hêzê xo seferber kerdo. Dişmeno nikayên kopyaya dişmenê verênî yo. Coka xoverdayîşo nikayên zî ganî xoverdayîşê 39 serrî verî xo rê esas bigêro.

Xoverdayîşê şerê şarî yo şorişgêr û Hemleya Wextê Azadîye xeta xoverdayîşî ya 14ê Temmuze û Hemleya 15ê Tebaxe xo rê esas gênê. Sere de Îmrali de pêro zîndanan de xoverdayîş esto. Gerîlayê çêrî û hêzê ma yê xopawitişî her rojde derbanê giranan danê dişmenî ro. Şar û dostê ma çar parçeyanê Kurdîstanî û teberê welatî de tim meydanan de yê. Nê pêro pê Xoverdayîşê 14ê Temmuze û Ruhê Serkewtişî yenê kerdene û dewamê Xoverdayîşê 14ê Temmuze yê. Senî ke Xoverdayîşê Rojeyê Mergî yê Pîlî yê 14ê Hezîrane vera rejîmê faşîstî yê 12ê Êlule ser kewt xoverdayîşo nikayên ê vera faşîzmê AKP-MHPyî zî do ser bikewo.

Serra 40. ya Xoverdayîşê Pîlî pê ruhêkê winasênî dest pêkerde. Xoverdayîşê Rojeyê Mergî yê Pîlî çalakîyêka winasên a ke tekrarê ci çin a. Serra 40. ya na çalakîya tarîxî de Rayberîya partîya ma, gerîlayî û hêzê xopawitişî, têgêrayîşê cinî û ciwanan, şarê ma û dostê ma her warî de xeta Xoverdayîş û Serkewtilê 14ê Temmuze de do têkoşîn bikerê, faşîzmê AKP-MHPyî çin bikerê û teqez do ser bikewê. Ne hêrişê MHPyî yê sadîstî ne zî fêlbazîya AKPyî ne zî paştdayîşê NATO û PDKyî do nêeşkê verê çinbîyayîşê înan bigêrê. Faşîzmê AKP-MHPyî do birijîyo, Kurdîstan do azad bo û Tirkîya do demokratîk biba.

Nê esasî ser o ma venga embazanê xo yê partîye, şarê xo yê welatperwerî û dostanê xo yê demokratîkan danê ke Xeta Xoverdayîşî ya 14ê Temmuze raşt fam bikerê, nê esasî ser o xeta xo bipersê, xo biresnê ferasetêkê raştikênî, her war de Roja ma ya Rûmetê Neteweyî ya 14ê Temmuze bi coşî fîraz bikerê, vera faşîzmê AKP-MHPyî Hemleya Wextê Azadîye pê Xoverdayîşê 14ê Temmuze û Ruhê Serkewtişî yê 14ê Temmuze aver berê.''