Komîteya Rayberdişî ya PKKyî bi wesîleya serrgêra Qirkerdişê Parisî yê 9ê Çeleyê 2013î eşkerayîyêke daye. Eşkerayîye wina ya:

''Ronayoxanê partîya ma ra Sakîne Cansiz (Sara), milîtanê têgêrayîşê ma Fîdane Dogan (Rojbîne) û Leyla Şaylemez (Ronahîye) 9ê çeleyê 2013î de Paris de hetê elemanê MÎTî Omer Guneyî ra ameybî qetilkerdene. Seba ke dewleta Fransa hesabê nê qirkerdişî nêpersa û roşnî nêkerd 23yê kanûna 2022yî de ancî Paris de Endama Konseya Rayberdişî ya KCKyî Evîne Goyî, hunermend Mîr Perwer û welatperwer Abdurrahman Kizil ameyî qetilkerdene. 

Her çî ra ver seba ke nê qirkerdişan roşnî nêkena û sereyê nînan gêna ma dewleta Fransa bi şîdetî şermezar û protesto kenê. Her çiqas dewleta Fransa hesab nêpersa zî ma sey têgêrayîşê azadîye, cinîyan, ciwanan û şarê kurdî 11 serrî yo seba ke hesabê Qirkerdişê Parisî bêro persayene têkoşîn kenê; têgêrayîşê azadîye û demokrasî her cayî ra vila kenê. Ma do serra 12. de her warî de hîna zaf têkoşînê xo aver berê û vîrameyîşê şehîdanê xo mîyanê têkoşînê xo de bidê pawitene.

Nê esasî ser o ma embazanê xo Sara, Rojbîne, Ronahî, Evîne, Mîr Perwerî û Abdurrahmanî bi minet û hûrmetî yad kenê. Ma soz danê ke armancanê înan do bîyarê ca. Ma do serra 12. de têkoşînê xo yê hesabpersayîşî Hemleya Globale ya 'Abdullah Ocalanî rê Azadîye, Meseleya Kurdan rê Çareserîya Sîyasîye' de yew bikerê û nê têkoşînî her warî de aver berê.

Her çiqas dewleta Fransa kena ke binimna ma zî rayaumûmîya demokratîke zî zanenê ke peyê Qirkerdişanê Parisî de kamî est ê. Nê qirkerdişî hetê rejîmê Erdoganî û şefê MÎTî yê ê çaxî Hakan Fîdanî ra ameyî plankerdene û caardene. Xora eşkera bîyo ke têtîkkeşê Qirkerdişê ê Çeleyî Omer Guney elemanê MÎTî yo û musteşarê MÎTî ra ferman girewto. 

La rixmê hende raştîyan zî dewleta Fransa qetî raştîyî eşkera nêkerdî û muhakeme nêkerd. Eqsê ci Fransa merg yan zî kişîyayîşê Omer Guneyî ra dima dosya qefilnaye. Eke tede yew menfaetê ci çin bo ganî dewleta Fransa cade nê qirkerdişan muhakeme bikera û ceza bida sûcdaran. Ganî Fransa venganê ke 6ê çeleyî de kuçeyanê Parisî ra berz bîyê bieşnawa. Eke wina nêkera o çax qebul kena ke hemkara nê qirkerdişan a.

Qirkerdişê Parisî hema parçeyê qirkerdiş û hêrişanê seserran ê vera kurdan ê hem zî vera şoriş û têgêrayîşê azadîye yê cinîyan hêrişê eşkera yê. Seba ke embaza ma Sakîne Cansiz nê qirkerdişî de hedef bîya raştîya armancan werte de ya. Ancî seba ke nê qirkerdişî cayêkê sey Parisî de verê çimanê pêro dinya de ameyî kerdene vera pêro merdimatîye tehluke û hêriş ê. Naye ra nê qirkerdişî ganî qetî nêrê qijkerdene û nimitene û ganî cade hesabê înan bipersîyo.

Sey têgêrayîşê azadîye, şarê kurdî û merdimatîya demokratîke 11 serran ra nata ma seba hesabpersayîşî têkoşîn kerd. Nê têkoşînî têgêrayîşê azadîye, têgêrayîşê azadîye yê cinîyan aver berd û kerd global. 11 serrî yo sloganê ''Jin Jiyan Azadî! Sara Rojbîn Ronahî'' fekê pêro dinya de yo. No têkoşîn ame perwerdekerdene û tira Hemleya Azadîye ya 10ê Teşrîna Verêne ameye viraştene.

Ma bi na Hemleya Azadîye dekewenê serra 12. ya têkoşînî. Çalakîyê protestoyî yê emserenînî zî bi hawayêkê girseyî û heybetînî qewimîyayî. Şarê ma mojna ke ê do qetî peyê kiştoxan nêverdê û heta peynî hesab bipersê. Aseno ke serra 12. de çalakîyê winayênî hîna bihêz bibê. Heta ke sûcdarî ceza bigêrê û edalet bîyaro ca têkoşîn do bêmabên dewam bikero. Têkoşînê vera nê qirkerdişan do Hemleya Azadîye ya Globale de bêro yewkerdene û têkoşîn xeta serkewtişî de do bêro kerdene.

Ma sere de çalakîyanê Paris û Berlinî yê 6ê çeleyî pêro çalakîyanê vera Qirkerdişanê Parisî selam kenê. Ma venga şarê xo û dostanê xo danê ke bi çalakîyanê hîna afernayoxan şertanê edaletê şorişgêrî bîyarê ca!''