Komîteya Rayberdişî ya PKKyî bi wesîleya serrgêra Xoverdayîşê Rojeyê Mergî yê Pîlî yê 14ê Temmuza 1982î mesajêko nuştekî weşana.

Mesaj wina yo:

''Ma sey têgêrayîşê azadîye û şarê kurdî serrgêra 40. ya Xoverdayîşê Rojeyê Mergî yê Pîlî yê 14ê Temmuze de yê. Ma 14ê Temmuze yo ke bîyo roja bira cuya azade ya vera koletî, îxanet û teslîmîyetî sey 'Roja Rûmetî ya Neteweyîye' îlan kenê. Nê esasî ser o sere de yê Rayber Apoyî, ma Roja Rûmetî ya pêro embazan, şarê xo û dostanê xo fîraz kenê, serra 41. de zî serkewtiş wazenê. Ma embaz Mehmet Hayrî Dûrmûş, Kemal Pîr, Alî Çîçek û Akîf Yilmaz bi rêzdarî û heskerdişî yad kenê. Ma sozê xo dibare kenê ke ma do armancanê nînan ser bivisnê û vîrameyîşê nînan bidê ciwîyayene.

Seke zanîyeno pêro erjê Kurdîstanî ke nameyê azadîye ser o, nê 40 serran de afirîyayê, esasê Xoverdayîşê Pîlî yê Zîndanî yê 1982yî de ameyî destvistene. Newroza 1982yî de Xoverdayîşî Zîndanî yo ke hetê Mazlûm Doganî ra dîya destpêkerdene û 17ê Gulane de hetê Çar Şorişgêran ra ame geşkerdene, 14ê Temmuze de Xoverdayîşê Rojeyê Mergî yê Pîlî zî verê xo da serkewtişê îdeolojîkî. Vera rejîmê faşîstî û leşkerî yê 12ê Êlule bira xoverdayîşî nê esasî ser o Zîndanê Amedî de ameye dayene. Naye ra dima zî bira tarîxîye koy, şaristan, teberê welatî de sey xoverdayîşê şar û gerîlayan kewte dewre.

Naye ser o Rayber Apoyî wina vatbi: 'Ma serê sozê xo yê seba Mahîr, Denîz û Îbrahîman kom bîyî, sozê xo yê seba Hakîyî ma PKK awan kerd, sozê xo yê seba Mazlûmî ser o agêrayî welatî, sozê xo yê seba Xoverdayîşê 14ê Temmuze ser o ma Hemleya 15ê Tebaxe daye despêkerdene. Bingeyê nê her çîyî de a raşte çarçewa Hemleya Gerîlayan a 15ê Tebaxe de Xoverdayîşê 14ê Temmuze est o. Kurdîstan de pêro çîyê ke nameyê azadîye ser o ameyê destvistene, bi têkoşînê nê esasî na bira tarîxîye ra ameyê destvistene.

Xoverdayîşê Zîndanî, bi taybetî çalakîya Rojeyê Mergî yê Pîlî yê 14ê Temmuze xet û terzê têkoşînê azadîya Kurdîstanî dîyar kerda. Hayrî Durmşo ke vatbi 'Serê gorê mi rê deyndarê şarê xo binusê', Kemal Pîro ke vatbi 'Ez nê têgêrayîşî de serfîrazîye vînena' na raştîye dîyar kerda. Na xeta şorişgêrî û welatperwerî ya 40 serre şarê kurdî perwerde kerd, rêxistin kerd û vist mîyanê çalakîye.

Têgêrayîşê ma û şarê ma ewro xeta 14ê Temmuze de xo ver dano û ser keweno. Gerîlayanê Azadîye Zap, Metîna û Avaşîn de xoverdayîşêkê tarîxî kenê, Xeta Rojeyê Mergî yê Pîlî kenê esas. Bingeyê 14ê Temmuze de derbê mergî dîyeno faşîzmê AKP-MHPyî ro û serkewtiş yeno destvistene. Nê esasî ser o Zap, Metîna û Avaşînî û pêro Kurdîstanî faşîzmê AKP-MHPyî û hişmendîya faşîste-qirkere rê benê goristan. Hêzo ke do çin nêbo, şarê kurdî û gerîlayê azadîye mojnenê merdimîye.

Nê esasî ser o ma gerîlayanê HPG û YJA-Starî reyna selam kenê, serkewtişanê înan zerrî û canî ra fîraz kenê. Ma pêro şehîdanê çêran ê xoverdayîşî bi rêz û heskerdişî yad kenê. Ma bi taybetî fermandar û şerwananê YJA-Starî selam kenê û înan rê serkewtiş wazenê.

Şarê ma û dostê ma yê şorişgêr-demokratî çar parçeyanê Kurdîstanî û teberê welatî de xoverdayîşêkê pîlî rayîr a benê, xeta 14ê Temmuze de têkoşîn kenê û ser kewenê. Xoverdayîşo tarîxî yê Mazlûm, Kemal, Hayrî û Sakîneyan 40 serrî verî Zîndanê Amedî de dest pêkerdi ewro seba cinî, ciwan û şarê kedkarî beno çimeyê îlham û tesîrî. Nê esasî ser o Hemleya ma ya Wextê Azadîye roje bi roje geş bena. Nê tewirê înan ê zelal û têkoşerî ra semed ma pêro cinî, ciwan, têkoşeran û şarê xo û dostanê xo selam kenê û înan rê serkewtişî wazenê.

Têgêrayîşê ma û şarê ma serra 41. ya Xoverdayîşê Rojeyê Mergî yê Pîlî wina pêşwazî kenê. Ma dîyar kenê ke serra 41. de zî xeta 14ê Temmuze de bi xurtî xo ver bidê û ser bikewê. Zelal o ke ma kewtê serra winasên a ke dîktatorîya AKP-MHPyî do birijîya û dekewa binê erdî. Ma hol zanenê ke na serre tehlukeyan ra ber îmkanî zî zaf ê. Ma do îmkanan hol bişuxilnê, verê tehlukeyan bigêrê û Kurdîstanê Azadî û Tirkîyaya Demokratîke biafernê. Nê esasî ser de sere de Amerîka û welatê Ewropa, ma pêro hêzanê NATOyî û welatanê bînan hişyar kenê ke wa paştî nêdê faşîzmê AKP-MHPyî. Ma dîyar kenê ke sere de PDK ganî kurdê hemkarê îşxalî zî hînî nêbê hacetê hêrişanê qirkeran û faşîstan ê AKP-MHPyî. Nê hêzî se kenê bikerê faşîzmê AKP-MHPyî do bêro rijnayene û ê do binê kerrayan de bimanê.

Wextanê peyênan de tay dormeyê serdestî yê Tirkîya, rewşa Îmrali û Rayber Apoyî ser o ca danê spekulasyonan. Ma bi baldarî û hêrsê pîlî nê çîyan teqîb kenê. No mojneno ke wayîrê nê spekulasyonan senî muxtacê raştîya Rayber Apoyî yê. Nê dormeyî hende qels bîyê ke hînî hêvîya xo bi parçebîyayîşê têgêrayîşê azadîye girê daya. Ma nê spekulasyonan sey xorinbîyayîşê teda û şantajanê serê Rayber Apoyî fam kenê. Nê esasî ser o ma venga pêro şarê xo û dostanê xo danê ke wa têkoşînê vera sîstemê îşkence û tecrîdî yê Îmraliyî geşêr bikerê.

Eşkera yo ke eke prosesê rijîyayîşê înan bi lezî bêro caardene, faşîzmê AKP-MHPyî tersî ra qirkerdiş, teda û hêrişanê xo bizêdîno. Sere de Herêmanê Pawitişî yê Medya de, Mexmûr, Şingal û Rojawan de hêrişan bizêdîno. Bi taybetî beno ke serê erdê Rojawanî hêrişanê neweyan ê îşxalî bikero. Vera her çîyî ma dîyar kenê ke ganî şarê ma û hêzê azadîye her warî de tedbîranê xo bizêdînê û vera dişmenê faşîst û qirkerî têkoşînê xo xurtêr bikerê. Ma bawer kenê ke şar û hêzê azadîye yê Rojawanî vera herişê neweyî yê îşxalî xoverdayîşêkê serkewte bikerê û verê dişmenî bigêrê. Wa şarê ma û dostê ma zî her ca ra paştî bidê nê xoverdayîşî.

Nê esasî ser o ma 'Roja Rûmetî ya Neteweyîye' fîraz kenê, afernayoxanê na roje bi rêz û hûrmetî yad kenê, sere de cinî û ciwanî venga şarê xo û dostanê xo yê demokratan danê ke wa Xeta Xoverdayîşî ya 14ê Temmuze hol fam bikerê û na xete de têkoşînê rijnayîşê faşîzmê AKP-MHPyî hîna heş bikerê!''