Bajarekê Şêladizê yê Amedîyê de têgêrayîşê hêzan ê taybetan ê PDKyî zêdîyeno. Ameyêne meraqkerdene ke peyê planê Reçbiraxa yê MÎT û PDKyî de çita esto. Ma resayî detayanê planî.

Eşkera bi ke PDKyî serekanê eşîranê herême de pêvînayîş kerd û tira vat ke eke ê Reçbiraxa de ca bibê xeta Banista û Nêrwe ra heta Geverî bero newe yê sînorî do bêro akerdene. PDKyî bi nê hawayî wadê ekonomîkî dayî eşîran. PDKyî bedelê ney de eşîran ra waşt ke vera PKKyî paştî bidê PDK û MÎTî.

Serê sînorê Behdînanî de 3 berê sînorî estê. Berê Xabûrî qezaya Silopî ya Şirnexî ra şino qezaya Zaxoyî ya Dihokî, Berê Serzêrî Çelê ra abeno û Berê Zêtê zî Germîyan ra şino Mêrgasorê.

Berê Serzêrî û Zêtê semedê destekê lojîstîk û sewqîyatê leşkerî yê baregehanê tirkan şuxilîyenê.

Eşkera yo ke no bero newe herême de hewce nêkeno, têna semedê mendekerdişê îşxalê Tirkîya fonksîyonel o. Bi xulasa pênaseyê planî wina yo: erdê Başûrî do bêro îşxalkerdene, pê viraştişê rayîrê îşxalî şarî ra bac do bêro girewtene, semedê asayîşê berî çeke bêra dayene destê şarî û pê şarî vera PKKyî şer do bêro kerdene.

Gelîya Balinda û xeta Çemçoyî de dewleta tirke xeylêk reyî hêrişê Reçbiraxa, Kunişka, Kinyaniş, Mervanos û Nêrwe kerdî. Nika nê cayî bi temamî veng ê. Şarê herême semedê heywankarîye û arêdayîşê meywe û sebzeyan têna yeno nê cayan. PDKyî 2019 de dekewtişê Gelîya Balînda qedexe kerd. Şarê herême pê rewşe qayîl nîyo. PDK xîret keno ke çeke bido destê şarê herême û qoricîtîya Vakurî Başûr de bîyaro ca.

PDKyî temmuza 2020î de wextê nawnayîşanê Şêladizê de mesuldarê xo yê Amedîyê Omer Oreyî şawit herême. Oreyîyî pêvînayîşanê bi rîsipîyan de vat ke ciwanî semedê bêkarîye wina kenê la ê do nê ciwanan binê yewinêke de bîyarê ca û bikerê pêşmerge. La ciwanê Şêladizê cara pêşmergeyî bîyî heta semedo ke meaşê înan nêdîyayêne çalakîye kerdêne. Eşkera bi ke PDKyî plan kerd ke nê ciwanî sey qoricîyan ca bikero û meaşê ciwanan zî dewleta tirke ra bigêro.

Dewleta tirke seke Efrîn de kerd wazena binî ra hêdî hêdî Başûr îşxal bikera. Ganî serekê eşîranê Şêladizê vera na rewşe baldar bibê û nêbê parçeyêkê nê planî.