Platformê Ziwanê Kurdkî bi wesîleya Roşanê Ziwanê Kurdkî yê 15ê Gulane eşkerayîyêke daye û pare kerd ke ganî kurdkî biba ziwano fermî û vat: ''Asîmîlasyon beno sebebê şerî.'' Platformî venga her kesî da ke her ca de bi kurdkî qisey bikero.
Platformê Ziwanê Kurdkî Meydanê Şêx Seîdî yê qezaya Sûrî yê Amedî de bi wesîleya Roşanê Ziwanê Kurdkî yê 15ê Gulane eşkerayîyêke daye çapemenîye. Hemserekê DEM Partî Tuncer Bakirhan zî tewrê eşkerayîye bi.
Hemvervatoxa Komîsyonê Kultur û Ziwanî yê DEM Partî Cemîle Turhalli eşkerayîya bi kirdkî wende.
Cemîle pare kerd ke meseleya kurdan bi asîmîlasyonê kurdan û înkarkerdiş û qedexeyê kurdkî dewam kena. Cemîle vat: ''Seba çinkerdişê erjanê kurdan asîmîlasyonêo plankerde yeno caardene. Ronîyayîşê Komara Tirkîya ra nata kurdî asîmîlasyonî red kenê. No asîmîlasyon zî beno sebebê şerî. Seba welatêkê aram, demokratîk û têdûştî ganî ziwanê kurdkî bibo ziwanê perwerdeyî û ziwano fermî. Ziwanê ma nasnameyê ma yo, rengê ma yo, tacê sereyê ma yo, estbîyayîşê ma yo û xeta ma ya sûr o.
Keyeyan, bazaran, kuçeyan, dibistanan, şaredarîyan, nêweşxaneyan, camîyan, mehkemeyan û her warê cuye de ganî ma bi ziwanê xo qisey bikerê, binusê û biciwîuê. Ganî ma her ca de hişmendîya kurdkî aver berê. Ganî ma her warê sîyasetî de bi kurdkî est bibê. Ma do xebatanê kultur, huner û têkilîyanê komelkîyan bi kurdkî bikerê. Ma do wayîrê estbîyayîşê xo vejîyê. Wext wextê ziwanê kurdkî yo.''
