Polîsanê tirkî perey eşkeyeyanê endamanê HDP, DBP, TJA, Komeleya Cinîyan a Rosa û Meclîsê Mayanê Haştîye yê Amedî kerd. Fotografê keyeyê maya haştîye Havva Kirana vejîyayî werte ke polîsan senî keyeyê ci serûbin kerdo.

Çarçeweya operasyonî de sereka Komeleya Cinîyan a Rosa Adalet Kaya, endama ronayoxe Narîn Gezgor û îdarekara komele Fatma Gultekîn, aktivîstê TJA Gulcîhan Şîmşek, hemserekê Pêroyî yo verên ê DBPyî Mehmet Arslan, endama Heyetê Rayberdişî yê HDPyî Ozleme Gunduz, hemsereka HDPyî ya Yenîşehîrî Remzîye Sizici, endamê Meclîsê Şaredarîya Rezanî Gonule Aslan û Veysî Coşkun, endama Meclîsê Şaredarîya Bajarê Pîlî yê Amedî Sevîme Coşkun, endamê HDPyî Mehmet Alî Altinkaynak, siyasetmedar û Celal Yoldaş rîyê şahîdê/a nimiteyî/e ra bi îdîaya ''endamîya rêxistene'' ameyî tepiştene.

Aktivîsta TJA Zelale Bîlgîn, endama Komeleya Cinîyan a Rosa Ayla Akat Ata, Endama Meclîsê Şaredarîya Yenîşehîrî Nevrîye Çur û Nazîre Tursun pê şertê kontrolê edlîyî û endama Meclîsê Mayanê Haştîye yê Amedî Havva Kiran bi şertê ''hepsê keyeyî'' ameyî veradayene.

Badê destbendkerdiş û tepişteyan fotografê keyeyê Kirane vejîyayî werte ke rixmo ke a grubê rîskî yê Covid-19î de ya û qedexeyê tebervejîyayîşê ci esto polîsan senî keyeyê ci serûbin kerdo.

Kirane bi serran o têkoşînê haştîye kena û vera naye xeylêk rey raştê îşkence û destbendkerdişan ameye.