Dewleta tirke seba çinkerdişê komelê Kurdîstanî pê pêro rayîr û metodan hêriş kena. 

Qezaya Geverî ya Colemêrgî de mabênê 13ê adare-31ê teşrîna verêna 2016î de qedexeyê tebervejîyayîşî amebi îlankerdene. Wextê qedexeyî de 5 hezar keye û kargehî rijîyayî û bi hezaran merdimî koçber bîyî.

Dewleta tirke nika zî pê destê polîsanê xo Gever de ciwanan rê fuhuş û kondoxî ferz kena. Kuçeyê Geverî de kafeyan de tewr zaf fuhuş yeno kerdene û qeza de sey kokaîn û eroînî kundoxî roşîyenê. Kundoxî pê destê polîsan yenê vilakerdene.

Verî qeza de kafeya 'One Way' de polîsanê tirkan cinîya ciwane rê tecawuz kerdbî û serê serebûtî girewtbi.

Cinîya ciwane ya bi nameyê F.ya ke kewta torra fuhuş û kondoxî agahîyê girîngî pare kerdî. F. vat: ''Nika kuçeyê Geverî de 6 kafeyan de her şewe cinîyê ciwanî hetê polîsan ra şuxilîyenê. Polîsan mi rê gef wend û ez eşta torra fuhuş û kundoxî. Nê kafeyan de madeyê kundoxî roşîyenê. Wexto ke ciwanî xo ra şinê polîsan dîmenê înan gênê û ciwanan rê gef wanenê. Wayîrê nê kafeyan zî polîsan reyde têkilîye de yê. Her cayê Geverî de fuhuş esto. Mi kafeyê One Wayî de lîmonata werde, ez xo ra şîya û dima mi telefonê polîsan de dîmenê xo yê rûtî dîyî. Polîsan pê vilakerdişê dîmenanê mi mi rê gefî wendî.''

F. da zanayene ke nê cayan de fuhuş û rotişê kundoxî estê: ''Kafeya Pardisa Restaurant wayîrê ci Îskender Çitak o, kafeya House wayîrê ci Nevzat Çetîn o, kefay Populer wayîrê ci Cevat Açikel o, kafe Loca wayîrê ci Harun Tona, kafeya La Casa wayîrê ci Recep Akbaş û kafeya One Way wayîrê ci Feroh o. ''

Ciwanê bi nameyê A.yo ke torra kundoxî de ya ard ziwan ke cadeyê Nedîm Zeydanî yê taxa Yeşîldere de ocaxê Osmanîyan esto ke nê kesî Wanî ra ameyî ardene û binê çimdarîya polîsan de kundoxî roşenê. A. îfade kerd ke Mobîlyaya Parisî de şewe û roje kundox yeno ancene û vat: ''Hertim ciwanî nê cayî de xo ra şinê. Xeylêk reî cinîyê ciwanî zî tewrê ma benê.''