Gerîla Denîze Ararat wexto ke hêrişanê vera Heftanînî dest pêkerd uja de bîye la dima birîndar bîye û herême ra ameye vetene. Gerîla Denîze Ararat îfade kerd ke gerîlayan Heftanîn de xoverdayîşêko pîl kerd. Ararate da zanayene ke xoverdayîşê parî yê Heftanînî bi bingeyê serkewtişê emserî.

Hêrişanê dewleta tirke Gelîya Pîsaxa ya herêma Partîzanî de dest pêkerd. Ararate vat ke artêşa tirke rê Girê Partîzanî de cewabî ameyî dayene û nê cewaban giranê Konferans, Sîser, Şehîd Merwan, Şehîd Şêxmûsî de dewam kerd. Ararete ard ziwan ke arteşa tirke neçare mende ke Girê Şehîd Merwanî ra xo bianca. Ararate vist vîrî ke bi taybetî xeta Xantûr-Şeşdara de derbê giranî dîyayî artêşa tirke ro. 

Ararate pare kerd ke Hamleya Cengê Heftanînî do dewam bikera û ê deyndarê fedayîyanê na hamle yê.

Ararate ma rê qala şehîdanê çêran ê sey Zelale Çîgdem, Zelale Amed, Nûcane, Agît Zaxo, Biharîn, Zagros û Amara kerde.

Zelale

Embaze Zelala ke fermandara Yewina Xosere bîye, şerê Zagrosî de bi qiseykerdişê xo çêrîya xo mojnaye. Wexto ke dişmen resa Pîsaxa embaze Zelale vat: 'Senî beno wa bibo ganî ma nînan asteng bikerê.' Çimanê aye de qesas estbi. Wexto ke operasyon bibi pîl embazan vatêne 'Embaze Zelale reyna govend girewt.' Raşta zî xeta aye de xoverdayîşêko bêhempa estbi. Embazê ma şehîd bîyî la dişmen rixmê teknîkê xo zî şoq bi. Rayberîya nê embazan de xoverdayîş am caardene. 

Nûcane

Ez bi wesîleya Nûcane tewra têkoşînî bîya. Îzmîr de wexto ke ez şîyêne dibistane mi a karê ciwanan de nas kerde. Beno ke embaze Nûcane tesîrê xeylêk kesan kerd. Mi tîya de embaze Nûcane dîye. Nê embazî hêrişanê dişmenî rê bîyî cewab. Nê embazan mojna dişmenî ke ê wina rehet nêeşkenê bêrê herêma ma.

Egîd Zaxo

Embaz Egîdî bi ciwanî û çeka xo ya şexsî vera kobrayan şer kerd. Dima ke embazê ey şehîd bibi rojnuşteyê xo de wina vatbi: 'Eke ez şehîd bi mi palaskaya embaz Arnûsî reyde defin bikerê.' Merdim wexto ke nê çîyan vîneno vano ke ez senî eşkena deynê xo bida înan. O zî pê palaskaya embazê xo şehîd bi. No perwerîya seba şehîdan mojneno. Îdareyê Herêma Başûrî vanê ke PKK têna Vakur temsîl keno. Embazê sey Egîd Zaxo nê vatişan kenê pûç. Embaz Egîd apê xo û 8 ciwanan reyde tewrê Têkoşînî bibi.

Zagros

Embaz Zagros Rojhelatê Kurdîstanî ra bîye. Wexto ke 15-16 serre bi tewrê têkoşînî bi. Çalakîya Girê Partîzanî de embazan rayberîya ey de 20 leşkerî kiştî. Embaz Zagros wexto ke agêrayêne hêrişê hewayî de şehîd bi. Tim seba operasyonê dişmenî amadekarîya ey  estbi vatêne: 'Eke dişmen bêro ma wina yew cewab bido ci ke tîya de nêmano.' 

Amara

Embaze Amara Serhedî ra bîye. Newe amebî Heftanîn. A zî heyrana xozaya Heftanînî bibî. Vatêne: 'Ganî meridm nêverdo ke dişmen bikewo nê cayan. Ganî ajanî nêeşkê bêrê nê cayan. No ca cayêko fîraz o.' Aye Girê Partîzanî yê herêma Pîsaxa de wezîfe kerdbi. Çalakîya Girê Partîzanî de şehîd bîye.

Biharîne û Dîren 

Embaz Biharîne, Dîren nê operasyonan de ciwan bîyî û înan destê ci ra çi bêro kerdêne. Rixmê teyarayanê keşfî zî nêvindertêne. Keda înan zaf pîl a. Warê Konferansî ra heta Qesrokî nêvindertêne. Embaze Biharîne rayberanê Cengê Heftanînî ra bîye û zaf ciwan bîye. To bidîyêne vatêne qey bi serran o ke gerîla ya. Hende perwera şehîdan û rêxistine bîye. Vatêne heta peyêne a do Heftanîn de biba. 

Alî Firat

Embaz Alî Firat newe amebi warê têkoşînî. Vatêne 'Ganî ez destê teyarayanê keşfî ra şehîd nêba. Ez şora dişmenî rê vaja çi karê înan tîya de esto.' Ey no xeyalê xo ard ca. Girê Partîzan de çalakîya ey de 20 leşkerî kişîyayî. Ê zî 3 kesî bîyî. Na çalakîye ra dima zî ey tay çalakîyan de ca girewt. Peynî de çalakîya sekbanîye de hêrişêkê hewayî de şehîd bi. O zî fermandarêk bi. Verî zî şerê vera cerganê DAÎŞî de birîndar bibi. Rixmê naye zî ame û nê cengî de zî ca girewt. 

Berfîne û Bêrîtane

Operasyonê Girê Konferansî de embaze Berfîne estbî. A wextêkê dergî Girê Partîzan û Konferansî de mende. Embaze Bêrîtane zî sey aye bîye. Nê embazî dekewtî mîyanê dişmenî û înan çeperê dişmenî îmha kerdî. Dima şehîd bîyî. No tewirê cinîyan ê Heftanînî zî mojneno. O çax hûmara embazanê camêrdan tay bîye. Nê embazan barêko pîl girewt xo ser.

Rûbare

Ez wazena tîya de qala embaze Rûbare bikera. Kênaya apê aye Amara Girê Partîzanî de şehîd bîye. Rixmo ke wezîfeyê aye yo bîn estbi israr kerd ke tewrê çalakîya Girê Partîzanî biba. Peynî de tewra na çalakîye bîye, kewte mewzîyanê dişmenî û şehîd bîye. Nê embazî bîyî rayberê verênî yê Cengê Heftanînî. Nika nê rayberî zêdîyenê.