Herêma Nehrî ya qezaya Şemzînanî ya Colemêrgî bi taybetmendîyanê xo yê xoza, cografîk û îklîmî herêmêka cîya ya. Na herême wayîra xeylêk eseranê tarîxîyan a ke Qesra Qeyme zî nînan ra yew a.

Qesra Kayme hetê lajanê Şêx Ubeydûllahî Şêx M. Siddik û Seyîd Abdûllahî ra mabênê serranê 1890 û 1910an de virazîyaye. Qesra ke bi mîmarîya xo ya heybetîne zaf bale ancena, bi hezaran kesî her serre zîyaretê ci kenê.

Tornanê Şêx Ubeydûllahî ra Fahîr Geylanîyo ke Şemzînan de esnafîye keno, bale ante girîngîya Qesra Kayme ser. Geylanîyî ard ziwan ke kurdan na qesre de derheqê babetanê sîyasî, dînî, komelkî û ekonomîkan de birî girewtêne û vat: ''Serewedaritişê Nehrî yanî bingeyê serewedaritişê tewr pîlî yê kurdan na qesre de ronîyayî, bira ci na qesre de ameye girewtene. Na qesre heman wextî de sey medreseyêka perwerdeyî şuxilîyayêne.''

Geylanîyî pare kerd ke bi beşdarîya serkêşanê kurdan kombîyayîşêkê Qesra Kayme de bire dîyaye û netîceya na bire de Şêx Ubeydûllahî kurdanê Rûsya rê mektubêke şawite, venga înan da ke tewrê têgêrayîşî bibê. Geylanîyî vat: ''Şêx Ubeydûllahî çarçewa Têgêrayîşê Nehrîyî de reya verêne dezgehê kurdî, eşîr û kesayetê sîyasî yê kurdî ardî yewca. Ey 1880an ra nata têkoşîn kerdêne. Têgêrayîşê kurdan hema zî binê tesîrê ye de yê.  Qesra Kayme zî serewedaritişanê Kurdîstanî rê meymandarîye kerde.''