Hemserekê Meclîsê Şarî yê Mexmûrî Hecî Kapanî derheqê rayraşîyayîşê azadîye, hêrişan û ablûqaya vera Mexmûrî de ANFyî rê qisey kerd.

Kaçanî da zanayene ke hêrişê vera Mexmurî verê çimanê rayaumûmîye de yenê kerdene û vat: ''Ma çend reyî Neteweyanê Yewbîyayeyan (NY) rê mektubî erşawitî, bale ante hêrişan ser. La înan têna hêrişî şermezar kerdî. Dewleta tirke vera Başûrî bi taybetî Kanî Masî, Qendîl de hêrişanê giranan kena. Heta nika nê hêrişan de zaf sivîlî merdî. Ma venga pêro partîyanê sîyasîyan û rayberanê kurdan danê ke vera hêrişan bêveng nêmanê. Ma wayîrê Rayberîye, erjanê xo yê neteweyîyan vejîyenê. Ganî sîyasetmedar, roşnvîr û hunermendê kurdî zî vera dewleta tirke erjanê xo bipawê.''

Kaçanî bale ante hêrişê 5ê hezîrane ser û vat: ''No hêriş pê hetkarîya kurdan ê xayînan ame kerdene. Seba ke ma teslîm bigêrê nê hêrişan kenê. Wextê hêrişanê DAÎŞî de zî armanc no bi la şarê ma yê Mexmûrî qetî teslîm nêbi. Ma girêdayîyê Rayber Apo û Têgêrayîşê Azadîye yê. 2017î ra nata vera Mexmûrî bi hawayêkê sîstematîkî hêrişî yenê kerdene. Hetê bînî ra ma ser o ambargoyê PDKyî esto. Na kampe de 12 hezar merdimî ciwîyenê.

Kampa ma binê asayîşê NYyî de ya la NY tim vera hêrişan bêveng o. Ancî hukmatê Iraqî û partîyê Kurdîstanî zî wayîrê kampe nêvejîyenê. Ganî Hukmatê Iraqî rayîr nêdo hêrişanê dewleta tirke.

Şarê Mexmûrî netîceya polîtîkayanê dewleta tirke yê 90an de neçare mend ke koç bikero. Ma 94î ra heta serra 98î Etrûş de mendî. Dima ma Nînova û Nehdaran de mendî. Ma hêrişanê dişmenî û ajananê PDKyî ra bîyî koçber. Ma nika Mexmûr de yê la hêrişê dewleta tirke dewam kenê.

Seba ka ma wayîrê ziwan û kulturê xo vejîyenê maruzê nê hêrişan manenê. Ewro Tirkîya de bi hezaran kurdî, sîyasetmedarê kurdî zîndanan de yê. La kurdan reyna zî ziwan û nasnameyê xo ra fek vera nêda.  Hêrişê dewleta tirke do nêeşkê înan rayraşîyayîşê rûmetî û azadîye ra dûrî bigêrê. Heta ke Rayber Apo û şarê kurdî azad nêbo cuye ma rê ercîyaye nîya. Ma do seba cuya azade têkoşînê xo rê dewam bikerê.''