Qeyûmê Şaredarîya Elbakî ya Wanî Asim Solako ke pêro şaristan talan kerdo nika zî cinîya xo Esra Solak sey Mudira Şubeyê Perwerdeyî ya Elbakî tayîn kerde.

Esra Solaka ke qet nêşîya Mudirîya Perwerdeyî ci rê wesayîtê meqamî yê şaredarîye zî ame dayene û 2 personelê şaredarîye zî semedê xizmetê ci ameyî wezîfedarkerdene. Esra Solak pê wesayîtê meqamî tewra karanê AKPyî bena.

Qeyûm Asim Solak pa Serekê AKPyî yê Elbakî Mugdat Sarihan û serqoricî Îskender Ertuşî qeza îdare keno. Şaredarîya Elbakî bi nê hawayî personelanê ke nêşinê kar la seke xebitîyenê asenê înan rê pereyan vila kena.

Personelê ke vera na rewşe nêrazîbîyayîşê xo mojnenê raştê xezebê Sarihan û Ertûşî yenê. Na şebekeya hîrê kesan û 'mutahît' yan pêro îhaleyan gênê yan zî kesan ra ke îhaleyan gênê xerec gênê.

Parka Amedî ya ke parka verêne ya Elbakî bîye û 2012 de pê paştdayîşê Hemserekê verênî yê Amedî Osman Baydemîrî virazîyabî, pê fermanê qeyûmî ameye rijnayene û darê parkî ameyî pakerdene.