Sîyasetmedar Ahmet Aslano ke endamîya meclîsanê şaredarîyan kerda, ANFyî rê qalê polîtîkayanê bênasnameverdayîşî û asîmîlasyonî yê qeyûman kerd.

Ahmet Aslanî pare kerd ke nêzdîbîyayîşê qeyûman verê şaristananê kurdan de wina yê; xerakerdişê awanîye, bênasnameverdayîşî, çinkerdişê tarîxê kulturî û înkarkerdiş. Aslanî vat: ''Qestî ra bi qeyûman mudaxeleyê her cayî ame kerdene. Pêro dînamîkê şaristanî zî bi xirabî binê tesîrê nê polîtîlayan de mendî. Qeyûman polîtîkaya înkarkerdiş û îmhakerdişê kurdan her cayî ra vila kerd. Amed de mudaxeleyê waran, vurnayîşê nasnameyê cayanê tarîxîyan, polîtîkayanê bênasnameverdayîşî qeyûman reyde dest pêkerd. Şehîtlîk, Ben û Sen, Sûr, Fîskaya, Mehella Quça, Taxa Fabrîka, Baglar û her ca de mudaxeleyê şaristanî ame kerdene. Prosesê xesardayîşê şaristanî hema zî dewam keno.''

Ahmet Aslanî îfade kerd ke bi plansazîyêka stratejîke ruhê şaristanî û waranê kulturelan do bieşkê newe ra geş bibê. Tîya de ganî şaredarî bi pêro beşanê komelî têbigêrê, karî asan bikerê, ge zî serkêşîye bikerê. Ganî xo wina rêxistin bikerê ke nasnameyê şaristanî newe ra geş bikerê, paştî bidê nê xîretan.

Eke bêro dîyene û ercnayene ke qeyûmî pratîk de dest eşto çita, waşto çita bivurno hinî do bêro famkerdene ke ganî çi bêro kerdene. Ca û wareyê komelî teyna bi ziwanê xo eşkenê newe ra biresê nasnameyê xo.ç Coka ganî merdim ziwanî ra dest pêbikero. Ganî her ca de bi kurdkî ma qisey bikerê. Ganî bînayan de mîmarîya şaristanî aver şora. Bi dînamîkanê şaristanî ganî na rewşe sey polîtîkayêke wa bêra ercnayene.''