Serekîya Baska Cinîyan a AKPyî ya Wanî pare şaredarîya qeyûmî ra waşt ke seba ke çalakîyanê AKPyî de bişuxilnê 3 hezar çanteyan bida înan. Şaredarîya qeyûmî şîrketa AKPgîran Şîrketa Îdeal Çanta Deri Tekstilî ra bi bedelê 162 hezar lîra 3 hezar çanteyî hêrînayî.

Muftutîya Wanî zî mesrafanê xo qeyûmî ra gêna. Qeyûmî budçeya şaredarîye ra seba şagîrtanê kursanê Quranî tîşortî hêrînayî û dayî muftutîye. 

Serekkomarê Tirkîya Erdogan û şirîkê ci Devlet Bahçelîyî 26ê tebaxe de Milazgîr de tewrê çalakîyan bîyî. Qeyûmî seba nê çalakîyan budçeya şaredarîya ra 300 wesayîtî şîrketêka terefgîranê AKPyî ra kîra kerdî.