Tirkîya û Vakurê Kurdîstanî de weçînayîşê 31ê adara 2019î Îdir de mabênê HDP û partîyanê blokê faşîstî AKP, MHP û ÎYÎPî de derbaz bi. Blokê faşîstî namzetêko hempar mojna la şaristan de HDP ser kewt. Blokê faşîstî netîceya weçînayîşî rê îtîraz kerd û îtîrazî ra dima reyê HDPyî zêdîyayî. Yaşar Akkuş û Eyleme Çelîk bîyî emşaredarê Îdirî.

Şarê Îdirî HDPyî ra kêfweş bîyî. HDPyî sozê xo ardî ca û wextêkê kilmî de meseleyî çareser kerdî. HDPyî bînaya şaredarîye kerde keyeyê şarî. Paştdayîş û bawerîya şarî yê seba HDPyî vera zêdîyayî. Hukmatê AKP-MHPyî na pê na rewşe qayîl nêbi û dest na Şaredarîya Îdirî ser. Walîyê Îdirî herinda hemşaredaran de sey qeyûm ame wezîfedarkerdene.

Qeyûm Unluyî wexto ke şaredarîye viste destî xebatkarê kurdî erşawitî karanê pakîye û tay mudirî karî ra girewtî û herinda înan de terefgîrê AKP û MHPyî kerdî wezîfedar.

Qeyûmî mudirê beşê îmarî wezîfeyî ra girewt û terefgîrêkê îqtîdarî ard wezîfe. Qeyûm mudirê karê fenî û ê muhasebe zî wezîfeyanê înan ra girewt. Xebatkarê ke wezîfeyî ra ameyî girewtene erşawîyayî beşê çopî û herinda înan de polîsî ameyî wezîfedarkerdene. Şaredarîya Îdirî ya ke wextê HDPyî ke şarî rê akerdebi, pê wesayîtanê zirxînan dormeyê ci ame girewtene û bi qereqol. Qeyûmê Îdirî zî gerreyê şaredarîye qereqolî rê keno.