Qirkerdişê 33 Guleyan ra ke qezaya Qoserî ya Wanî de qewimîya, 77 serrî vîyartî. Keyeyê qurbanan ê ke hema zî hesteyê merdimanê xo nêdîyê, wazenê ke dewlete uzrê xo biwaza û cayê qirkerdişî Dereyê Seyfoyî waranê qedexeyan ra bêro vetene.
Serra 1943î de qezaya Qoserî ya Wanî de 40 dewijî yenê destbendkerdene. Mehkeme înan ra 5 kesî tepişnena û ê bînan zî vera dana. La Orgeneral Musrafa Muglaliyo ke hetê Serekkomarê ê çaxî Îsmet Înonîyî ra ame wezîfedarkerdene, reyna dewijan dest bend keno. Dewijî bi îdîaya 'qaçaxçi' têhet dîyenê guleyan ver. Dima zî yeno îdîakerdene ke dewijî semedo ke xîret kerd ke biremê kişîyayî. La nê dewijan ra kesêk bi hawayêkê birîndarî remeno Îran û serran ra dima gerreyê qirkerdişî keno. La nêeşkeno netîceyêk bigêro.
Dima Partîya Demokrate (DP) bîye îqtîdar seba ke vera CHP şer bikero qirkerdiş ano rojdemê Meclîsî. Derheqê tay leşkeran û îdarekaran de tehqîqatêk dîyeno destpêkerdene. Muglaliyî rê serra 1950î de cezaya zîndanî ya 20 serran dîyena la Mehkemeya Leşkerîye na bire betal kena. Muglali serra 1951î de zîndan de hukmkerdişê verî mireno.
Dewlete serra 2004î de Qoserê Wanî de cayê serebûtî de nameyê warêkê leşkerîyî kerd pa 'Orgeneral Mustafa Muglali'. Nêrazîbîyayîşan ra dima dewlete neçare mende ke serra 2010î de nameyê Muglaliyî wedara.
Gelîya Sefoyî 77 serran ra nata qedexe ya
Cayê qirkerdişî Gelîya Sefoyî 77 serran ra nata seba ke waro leşkerî yo dekewtişê ci qedexe yo. Merdimê qurbanan nêeşkenê şorê Dere. Keyeyan wextêk waştbi ke herême de statuyê vîrameyîşî virazê la no waştiş nêame qebulkerdene.
Ma serrgêra 77. ya Qirkerdişê 33 Guleyan de keyeyanê qurbanan reyde qisey kerd. Keyeyî wazenê ke qedexeyê dekewtişî bêro wedaritene û herême hînî sey warê leşkerîyî nêbo.
Cîzeyîr Ozkaplano ke nê qirkerdişî de merdimê ci qetil bîyî, vat: ''Nê qirkerdişî ra dima şîn, bermayîş pêro hetê dewlete ra ameyê qedexekerdene. Cenazayî nêdîyayî keyeyanê ci. A roje ra dima zî qirkerdişî dewam kerd. Pîrikê ma ameyî qetilkerdene, tornê înan zî hê yenê qetilkerdene. Ma venga hukmat û dewlete danê ke wa uzrê xo biwazê.''
Omer Işikî zî merdimêkê qurbanan o. Işikî Şubeyê Wanî yê ÎHDyî de bi serran serekîye zî kerde û seba roşnkerdişê nê qirkerdişî têkoşîn kerd. Işikî vat: ''O çax dewlete seba ke îradeyê kurdan bişikna ê qetil kerdêne. Nê qirkerdişan ra yew zî Qirkerdişê Gelîya Sefoyî yo. Ewro zî qirkerdişê vera kurdan dewam kenê. 1943î ra nata çîyêk nêvurîya.''
