Qirkerdişê dewleta tirke Silêmanî de ame protestokerdene

Qirkerdişo ke dewleta tirke Kunemasîya Silêmanî de kerd, hetê şarê Silêmanî ra ame protestokerdene.

Vizêr dewleta tirke dewa Kunemasî ya bajarekê Şarbêjarî ya Silêmanî ser o bombayî varnabî. Hêriş de 2 kesan dinyaya xo bedilnaye, 2ê ci domanî 8 kesî zî birîndar bîyî. Şarê Silêmanî pê çalakîyêke qirkerdişê dewleta tirke protesto kerd.

Çalakîya rayberîya Têgêrayîşê Azadîye de ameye kerdene û fotografê birîndaran û alaya rengîne ameyî kiriştene. Endamê Komîteya Amadekarîye Wehab Ahmedî çalakîye de qisey kerd û îfade kerd ke vera hêrişan ganî pêro hêzî pîya têbigêrê.

Şarê Başûrê Kurdîstanî qezaya Kelarî ya Germîyanî de Parka Leyla Qasimî de ame pêser ke hêriş protesto bikero la asayîşî nêverda. Hêzanê asayîşî çalakîye ra verî dormeyê parke girewt û pê bahaneya vîrusê Korona nêverda ke hemwelatîyî bendan ra derbaz bibê.