Kesê ke wextê Terteleyê 1938î de Qulika Zînî de ameybî qetilkerdene hetê girseyêkî ra ameyî yadkerdene. Seba qurbananê qirkerdişî Qulika Zînî de çerayî ameyî tavistene.

Girseyî ra Kenan Duzgunkayayî îfade kerd ke înan rê dejê Qulika Zînî teze yo û vat: ''Seke no qirkerdiş ewro bîyo ma wina dejê ci ancenê. Ma wazenê wa mesuldarê nê qirkerdişî bêrê cezakerdene.''

Nuştox û cigêrayox Cemal Taşî da zanayene ke mesuldara nê qirkerdişî dewleta tirke bi xo ya û vat: ''Dewlete hol zanena ke êyê ke qetil kerdê, ça de definkerde yê. Çîyo ke ganî ma bikerê no yo ke naye ra pey têkoşînî bigêrê xo milî û pê paştdayîşî têbigêrê.''

Ciwanê bi nameyê Alî Duzgunkayayî vat: ''Ma wazenê wa esteyê ke tîya de yê, bêrê arêdayene, tîya de yew peykerê yadkerdişî bêro ronayene û nameyê qurbanan serê ci de bêrê nuştene. Ma zî o çax bieşkê merdimanê xo yad bikerê, loqmayan vila bikerê, şêrê serê goranê xo.''

Qulika Zînî de se bibî?

8ê tebaxa 1938î de qasê 100 kesê bêsûcî wextê serebûtanê Terteleyê Dêrsimî de sînorê Dêrsim-Erzînganî de Qulika Zînî de bi hawayêkê komkîyî ameyî kiştene. O çax herêma Qulika Zînî sey 'qedexe' ameye îlankerdene. Bi nê hawayî meyîtê nê kesan zî nêameyî definkerdene. Hemwelatîyê bînî yê herême zî ameyî surgunkerdene. Serra 1950an de herême de qedexe wedarîya û esteyê qurbananê Qirkerdişê Qulika Zînî ameyî dîyene.

Serra 8ê temmuza 2014î de hetê Înîsîyatîfê Qulika Zînî ra esteyî ameyî komkerdene û cayêkê yadkerdişî ame viraştene.