Bajarekê Vartînîsî yê qezaya Têlî yê Mûşî de 3yê teşrîna verêne ya 1993yî de leşkeran keyeyê Ogutî dabi adirî ver. Serebût de Nasir Ogut, Eşref Ogut, Sevîme Ogut, Sevda Ogut, Mehmet Şakîn Ogut, Mehmet Şîrîn Ogut, Aycane Ogut, Cîhan Ogut û Cînal Ogut ameyî qetilkerdene.

Serebût de teyna Fermandarê Cendirmeyan ê Haskoyî Bulent Karaoglu ame muhakemekerdene la nêame tepiştene. Roniştişê dewa yo bîn 1ê teşrîna peyêne de yo û rîsk est o ke dewa wextvîyartişî ra do bikewa.

Rojnameger Adîl Harmanciyo ke o çax Buroyê Wanî yê Ozgur Gundemî de xebitîyayêne xebera qirkerdişî kerdbî. Harmanciyî qala çimdarîyanê xo yê serê qirkerdişî wina kerde: ''Ez şîya Vartînîs. Wekîlê DEPî Remzî Kartalî goristan de qisey kerd. Serekê ÎHDyî yê Wanî û Serekê DEPî yê Wanî Mehmet Alî Durmaz zî est bîyî. Dewijan keyeyê Ogutî defin kerd. Bajarek de xeylêk meyîtê heywanan zî est bîyî. Hema zî serê nînan de dû est bi. Banê keyeyê Ogutî bi temamî vêşabi, tede 9 ferdê keyeyî ameybî qetilkerdene. 

Ez û embaz Sabahattîn Yilmazî ma roniştoxanê Vartînîsî de qisey kerd. Înan vatêne tîmanê taybetan û qoricîyan eşto keyeyê Ogutî ser, gefî wendê û keye vêşnayo. Keye û axûrî ra ber şaredarîye zî dîyabi guleyan ver. Her kes zaf tersayêne. Mi rojnamegerê Sabahî rê pers kerd ke ê do xebere biweşanê yan ney. Ey vat 'Ez bawer nîya. La reyna zî mi çi eşnawito do binusa.' Wina zî bi. Roja bîne Sabahî û rojnameyanê bînan xebere sey 'sereştişê PKKyî' servîse kerd. Derheqê nê serebûtî de tehqîqatêko raştikên nêame kerdene. Heta beno ke mehkeme de dewa bêra betalkerdene.''