Tewr tay 40 dewanê Dêrik û Qoserî de 16 rojan ra nata hetê DEDAŞî ra awe û ceyranê şarî birîyayî. Hemwelatîyanê cinîyan vat: ''Ma nêeşkene keyeyê xo pak bikerê, awe bidê heywananê xo. Wa cade nê zulmî biqedînê.''
14ê gulane ra nata awe û ceyran nêdîyenê tewr tay 40 dewanê Dêrik û Qoserî. DEDAŞî bi îdîaya 'deynanê ceyranî yê citkaran' ceyranê taxan birna. Cinîyanê dewa Sinarî da zanayene ke ê pê tankeran dewanê bînan ra awe anê, kincê înan ê pakî nêmendî û venga selahîyedaran da ke nê zulmî biqedînê.
Dewijan ra Medîne Turan vat: ''Bi hewteyan o ke awe û ceyran çin ê. Ma pê tankeran dewanê bînan ra awe anê la a zî ma rê qîm nêkena. Ge ge awe çin a ke ma bişime. Ma mîyanê pîsî û lêşinî de yê. Hînî bes o! Ma her serre wina mexdûr benê. ''
Xensa Akça zî nêrazîbîyayîşê xo wina ard ziwan: ''Şima rewşa ma vînenê, înan ma perîşan kerdî. Tewr zaf zî cinîyî zehmetîya ci ancenê. Ceyranê ma vera akenê dima gênê. Wina zî pêro makîneyê ma xeripîyayî.''
Dewije Xezale Bîlen zî eşkera kerd ke înan bi rojan o ke keyeyê xo pak nêkerdî û vat: ''Ma nêeşkenê firaqanê xo bişuwê, kincê ma lêşin ê. Ma nêeşkenê awe bidê heywanan. Vanê rîyê deynan ra ceyranê ma birîya la ne axpînê ma esto ne zî bîrê ma. Wa cade awa ma akerê, yew çareserîye bivînê.''
