Programê 'Wext Wextê Yewîya Neteweyîye û Azadîye yo' yê KCD, DBP û HDPyî yo ke semedê ronayîşê yewîya neteweyîye 16 sibate de Mêrdîn de destpê kerd dewam keno. 

Çarçewa programî de ewro Qoser de eşkerayîya çapemenîye ameye organîzekerdene. Polîsan bi bahaneye qedexeyê çalakî û aktîvîteyan ê 15 rojan heme rayîrî girewtî destûr nêda HDPyîjî bikewê qeza. Reyna cayê çalakîye  Meydanê Azadîye zî gerîya binê ablûqa. Seba ke destûr nêdîya eşkerayîye Hemserekê DBPyî Salîha Aydenîz û Keskîn Bayindir û Vervatoxa HDPyî Ebru Gunay û parlameterî zî tede partîyîjan verê berê banê partîye ya qeza de eşkerayîye daye.

Aydenîze vera polîsan nêrazîbîyayîş ramojna û vat: ''Ma rixmê heme hêriş û zextan tîya yê. Tirkîya ewro nûqtaya ke resaya ci no îşxal o. Vera nê îşxalî şarê kurdî do çirey bêveng memano. Ma wazenê Tirkîya wa bibo demokratîke.  No ablûqa zî wazeno ke Tîrkîya binê tecrîdî de bitepişo. Ma verê zextên de peyser game nêerzenê. Ma Qoserî ra heme Kurdîstan û Tirkîya rê vengê xo kenê berz. Ewro tîya ra bewlî yo ke Tirkîya çi hale de ya.

Tecrîdê Îmraliyî heme welatî ra vila bîyo. Ganî berê Îmraliyî bêrê akerdene û tecîd bêro wedaritene. Eke tecrîd dewam bikero, polîtîkaya şerî bena xorî, krîzê ekonîmî beno xorî, binpaykerdişê heqanê merdiman ê zîndanan zêdîyenê. Wexto ke birêz Abdullah Ocalan qisey keno haştîye yena qalkerdene, Tirkîya nefeso rehet gena. Coka ganî tecrîd bêro wedaritene.

Ma sey vizêrî ewro zî do tim mucadele bikerê. Şima zî sey desan îqtîdaranê bînan do çobê tarîxî de cayê xo bîgêrê. Şima do hesabê Garê, Roboskî, Cizîre û Sûrî bidê.

Wex wextê yewbîyayîşî yo. Wext wextê pawitişê destkewteyan o. Wext wextê berzkerdişê demokrasî û sîyasetî yo. Şertî senî benê wa bibê kurdî do tim mucadele bikerê û semedê  sîyasetê demokratîkî bikerê xo çeng.  Ganî muxalefetê Tirkîya zî vera faşîzmî bêveng memano. Ma do vera faşîzmî ser bikewê.''