Rapor: Xarpêt de tepişteyan rê îşkence yeno kerdene
Komeleyanê tepişteyan û avûkatan Zîndanê Xarpêtî zîyaret kerd û da zanayene ke zîndan de îşkence yeno kerdene û heqê tepişteyan yenê binpaykerdene.
Komeleyanê tepişteyan û avûkatan Zîndanê Xarpêtî zîyaret kerd û da zanayene ke zîndan de îşkence yeno kerdene û heqê tepişteyan yenê binpaykerdene.
Federasyonê Komeleyanê Huqûq û Paştdayîşî yê Keyeyanê Tepişteyan û Hukmwerdetan ê Medî (MED TUHAD FED), Komeleya Huqûqnasan a Seba Azadîye (OHD) û Komeleya Paştdayîşê Keyeyanê Tepişteyan a Amedî (TUAY-DER) derheqê binpaykerdişê heqan ê Zîndanê Xarpêtî de bînaya MED TUHAD-FEDî de kombîyayîşê çapemenîye kerd.
Endam û îdarekarê MED TUHAD-FED, OHD û TUAY-DERî tewrê kombîyayîşî bîyî. Hemserekê MED TUHAD-FEDî Mehmet Temîzyuzî eşkerayîyêke daye û pare kerd ke keyeyan derheqê îşkenceyî de muracat kerd û vat: ''Muaracatê keyeyan ra dima heyetê ma 7ê tebaxe de tepişteyan reyde pêvînayîş kerd. Tepişteyan îfade kerd ke 5ê tebaxe de hûmaritişî ra dima gardîyanî dekewtî koxûşan û înan Umran Cengîz û Burhan Renklî derb kerdî û berdî hucre. Rojêke ra dima gardîyanan ê ardî oadayanê xo û derbkerdişî ra pey leşê înan bibî sûr, cayê derbî tesbît bîyî. ''
Temîzyuzî ard ziwan ke zîndan de nê binpaykerdişî yenê kerdene:
-Cezaya dîsplînî ya keyfî dîyena, 32 reyî cezaya dîsîplînî dîyaye tepişteyêk. Bi nê cezaya înfazê 4 hukmwerdeyan ameyî xeripnayene.
-Dest nîyeno rojnuşte û nuşteyanê tepişteyan ser. Îdareyê zîndanî tepişteyan rê vat: 'Çîyêk menusê ma destûr nêdanê.'
-Bi bahaneya ke zîndan de ca çin o kargoyê tepişteyan nêgêrîyenê.
Temîzyuzî da zanayene ke pêşnîyazê înan ê seba binpaykerdişê heqan ê Zîndanê Xarpêtî wina yê:
-Ganî vera îşkence û kerdişanê xiraban muracatê huqûqî bêro kerdene.
-Ganî dezgehê neteweyî û mîyanneteweyî derheqê meseleyanê tepişteyan de bêrê agahdarkerdene.
-Ganî derheqê cezayanê dîsîplînî de muracato huqûqî do bêro kerdene.
-Seba tedawîya tepişteyan ganî muracat bêro kerdene.
-Ganî Dezgehê Înfazî yê Ceza rayberîya Komîsyonê Heqanê Merdiman ê Meclîsî de pêro rêxistinanê sivîlê komelkî reyde zîndan zîyaret bikero û çimdarîye bikero.