Gerîlaya Hêzê Pawitişê Cinîyan (HPJ) Nejbîre Cûdî îşxalê Kurdîstanî û rolê gerîlayan ê cinîyan ser o ANFyî rê qisey kerd. 

Gerîla Nejbîre da zanayene ke şero tewr çetin Îmrali de qewimîyeno û vat: ''Dişmen key bikewo tengîye hêrişê Îmraliyî keno. Ma hêzê xoverdayîşî fikranê Rayber Apoyî ra gênê. Gerîlayî pê nê hêzî teknîkê dişmenî kenê pûç.  Kurdî heta nika xeyrê keda Rayber Apoyî ra payan ser o mend. Dişmen do pê gerîlayan nêeşko. Senî ke Garê de bin kewt dişmen do Metîna, Zap û Avaşîn de zî bin bikewo.

Rayber Apoyî kurdî qirkerdişî ra pawitî. Seke Rayber Apoyî verî seba ci veng da ganî ma yewîya xo awan bikerê, ganî pêro partîyê kurdan seba ney xîret bikerê. Seba pawitişê Kurdîstanî wext wextê caardişê yewîya neteweyî yo. Tayî vanê çi karê PKKyî Başûr de esto? Persa raştikêne ganî na biba: Çi karê AKP-MHPyî Başûr de esto? Eke gerîlayî û pêşmergeyî pîya vera dişmenî şer bikerê çew nêeşkeno kurdan vindarno. 

Cinîyê kurdî pê fikranê Serek Apoyî bîyî rayberê dinya, sembolê xoverdayîşî. Rayber Apoyî ruhê azadîye musna ma. Cinîyî do awankerdişê yewîye rê zî rayberîye bikerê. Ma pê bawer ê ke cinîyî do vera îşxal û parçebîyayîşî wezîfe û mesuldarîya xo bîyarê ca.''