Wan de polîsê tirkî kuçeyo ke rêxistina HDPyî tede ya pê barîyeran qefilna û destûr nêda peyeyî ravêrî.

Rêxistina HDPyî ya Bajarî hesabê xo yê twîtterî ra da zanayene ke polîsan dekewtişê kuçeyî girewto û destûr nêdanê şar bêro banê înan. Eşkerayîye de ame vatene ke îdarekarê partîye yê bajar û qezayan û wekîlî patrîye de yê û venga şarî dîya ke wa  şiro banê partîye.

Wekîlê HDPyî yê Wanî Murat Sarisaçî zî hesabê xo yê medyaya sosyale ra mesajêk pare kerd. Sarisaçî vat: ''Ma xora nêeşkenê verê partîya xo de eşkerayîyêke zî bidê. Polîsan ewro her ca de barîkatî nayî ro û vat do çalakîye bêro kerdene. Ma rê verê partîya ma qedexe yo la êyê ke pê polîsan yenê înan rê serbest o. No yeno no mana ke qedexeyê OHALî qedîyayo. Ma zî do verê walîtîye eşkerayîye danê.''

Sarisaçî vat: ''5 serrî yo Wan de qedexeyê OHALî bêmabên dewam kenê. Rayîrê ke şinê partîya ma ameyî qefilnayene. Ma zî heta ke nê qedexeyî biqedîyê verê Walîtîya Wanî de yê. Ma do tîya eşkerayîya çapemenîye bikerê.''