Dima ke baxçeyê Cemxaneyê Duzgun Babayî de peykerê qurbanê Qirkerdişê Madimakî Hasret Gultekînî ronîya tay rêxistinanê elewîyan îfade kerdbi ke ronayîşê peykerî etîk nîyo û mesele ser o nîqaşan dest pêkerdbi.

Ocaxê Axuçan, Ocaxê Munzur Babayî, DAD, Komaleyê Dêrsimî yê Dormstadtî, Bochum û Hannoverî, DEDEF, Cemxaneyê Duzgun Babayî, Weqfa Dêrsimî ya Hollanda, Ocaxê Sirî, Yewîya Ocaxanê Kureyşan, Şubeyê Dêrsimî yê Komeleya Pîr Sultan Abdalî, Cemxaneyê Gimgimî û Ocaxê Şeyh Çobanî Jîyargeyê Duzgun Babayî de ameyî pêser û înan derheqê babete de eşkerayîyêke daye.

Pîranê Ocaxê Kereyşanî ra Suleyman Yildizî nameyê beşdaran ser o eşkerayîye wende û îfade kerd ke peykerê  Hasret Gultekînî pawîyeno û cara heta nika Duzgun Babayî de seba çîyanê sey peyker, rayîr, bank ûsn. destûr nêame dayene.

Yildizî da zanayene ke 25ê temmuze de Cemxaneyê Duzgun Babayî de derheqê babete de pê beşdarîya xeylêk rêxistin û dezgehan kombîyayîşêk ame kerdene. Yildizî vat: ''Kombîyayîşî ra dima îdarekaranê Komeleya Pîr Sultan Abdalî mabênê xo de qisey kerd û waşt ke peyker Duzgun Baba de cayê xo bigêro. Tay temsîlkaranê Komeleya Pîr Sultan Abdalî ra bêrî pêro beşdarê kombîyayîşî nê birê hemparî girewtî:

-Verê cayê ma yê fîrazî de ronayîşê peykerî xelet o.

-Komeleyî dezgehê xizmet û kulturelî yê. Ê bawerîyêke temsîl nêkenê. Ocaxê ma bawerîya ma temsîl kenê.

-Raşt nîyo ke seba menfaatanê şexsîyan erjê ma yê fîrazî sey hacet bêrê xebitnayene. Hîsgerîya bawerîye ya şarê ma seba waştişanê şexsîyan wa nêra fedakerdene.

-Ma pêşnîyaz kerd ke peykerê Hasret Gultekînî waranê sivîlan de bêro ronayene.

-Ma bire daye ke Dêrsim de qet yew cayê fîrazî de çîyê sey bust, peyker, gor, reklamî nêrê ronayene.

- Hayîya ocax û dezgehanê Dêrsimî pê ronayîş û wedaritişê peykerî ra estbî. La tay kesanê nîyetxiraban pê nîqaşî xîret kerd ke nîfaq bikero mabênê elewîyan. Heqê çewî çin o ke peykerî ser o Dêrsim sûcdar bikero, şantaj bikero, pê zanayîşê xeletî komelê elewîyan pare bikero. Şehîdê Sêwasî ganê ma yê. Ma seba ke erjanê xo bipawê na bire girewte. Ma nêwazenê ke çew bidejnê.''