Komeleya Elewîyan ê Demokratîkan (DAD), Komeleya Dêrsimijan, Komeleya Gimgimijan a Anqara û Komeleya Hetkarîye ya Depe û Dormeyê Ci derheqê qirkerdişanê heywanan ê koyîyan ê Dêrsimî de kombîyayîşê çapemenîye kerd.

Salona kombîyayîş de pankarta bi nuşteyê ''Seydwanîye spor nê cînayet a. Xoza, bawerî û fîrazîyanê ma ra destê xo bigêrê'' daliqîyaye. Serekê Komeleya Dêrsimijan a Anqara Yaşar Kilavuzî eşkerayîye wende.

Kilavuzî pare kerd ke vera cografyaya Dêrsimî pê HES, madenan, şewatê daristanan û seydwanîye hêrişî yenê kerdene û vat: ''Dewlete Dêrsim de pê îhaleyan heywanan dana kiştene. Ma vera qirkerdişê seydwanan bêveng nêmanenê. Kesê ke vera nê qirkerdişî bêveng ê çimê ma de hemkarê qirkerdişî yê.

Xozaya Dêrsimî pê awbend, maden, şewatan yena qirkerdene û heywanî zî hetê seydwanan ra kişîyenê. Goreyê bawerîya ma ya Reya Heqîye xoza û pêro gandarî fîraz ê, rîyê Heqî yê. Semedê elewîyan erdê Dêrsimî erdê Dêrweşî yo.''

Kilavuzî venga dezgehanê bawerîyan, ekolojîstan, pawitoxanê heqanê heywanan û rayaumûmîya demokratîke da û vat: ''Vera dewlete fekê xo akerê, tewirê xo bimojnê.''