Qezayanê Eyyûbîye, Sêwrege, Pirsûs, Wêranşar û Karakopru yê Riha de dima ke testê vîrusê Korona yê tay kesan pozîtîf vejîyayî 11 bînayî gêrîyayî binê karantîna. Deweka Bogurtlenî ya Pirsûsî, deweka Erbeyî ya Sêwrege û deweka Yolgeçerî ya Xalfetî zî gêrîyayî binê karantîna. 

Dewa Ernebatî ya qezaya Cizîre ya Şirnexî de zî testê vîrusê Korona yê 3 kesan pozîtîf vejîyayî. Nêweşî wedarîyayî nêweşxaneyan. Xebatkaranê weşîye dewe de veşê her kesî kontrol kerd. Yeno pawitene ke dewe de hûmara nêweşan bizêdîyê. Rixmê 3 waqayan zî dewe nêgêrayaye binê karantîna. Cizîre de hema zî xeylêk kuçe û keyeyan de karantîna dewam kena.

Amed de zî dima ke tedbîrê vîrusê Korona ameyî sistkerdene hûmara nêweşan resaye 150 ke  destpêkê vilabîyayîşê vîrusî ra nata na hûmara tewr berze ya.Şaristan de bi taybetî rixmê qedexeyî şin û aktîvîteyê bînî ameyî kerdene. Tewr peyên zî taxa Avdalli ya qezaya Çinarî de  kesêk 15 kesan rê vîrus vila kerd.