Dewleta tirke ya îşxalkere pê têkoşînê şarê kurdî nêeşkena û pê şerê taybetî wazena komelê kurdan têkoşînî ra cîya bikera. Dewleta tirke bi nê armancî tay keyeyî verê bînaya HDPyî ya Amedî de kom kerdî. La nê kerdişê xo ra qet yew netîce nêgirewte.

Gerîla Rojhat Haruno ke dewleta tirke keyeyê ci verê bînaya HDPyî nişnayo ro serra 2015î de qala sebebanê tewrbîyayîşê xo ANFyî rê kerde.  

Gerîla Rojhat Harunî vat: ''Ez 1993 de dewa Tewerzî ya qezaya Farqînî ya Amedî de dadîya xo ra bîya. Ez Amed de bîya pîl, mi uca de dibistane wende. Welatperwerîya şaristanê Amedî zaf tesîrê mi kerd. Cigêrayîşanê mi lîse de asta sempatîzanîye de dest pêkerd. Mi wextê zanîngehî de Sakarya de têgêrayîşî ser o cigêrayîşî kerdî. Ez Sakarya de zaf reyî raştê gefanê dewlet û dezgehan bîya. Ney zî meraqê mi zêdîna.

Serra 2015î de mi prosesê çareserîye nêzdî ra teqîb kerd û mi fam kerd ke dewlete prosesî rê dewam nêkena. Mi o çax fam kerd ke bê têkoşînê çekdarî têkoşînê şarê kurdî do ser nêkewo. Coka ez 2015 de koyanê Botanî de tewrê gerîlayan bîya. 2015 de mabênê ma û dewleta tirke de şerêko giran estbi. Dewlete waşt têgêrayîşê ma tasfîye bikera.

La Planê Çokdayîşî yê dewlete ser nêkewt. Dewlete waşt pê rayîranê bînan ser bikewa û şarî bixapîna. Nê rayîran ra yew bi ke dewlete keyeyî şawitî verê berê HDPyî. Nê keyeyan rê vat 'HDP domanê şima xapînayî û şawitî koyan.' La no raşt nîyo. 

Nînan ra yew zî keyeyê min o. Ez bi îrade û fikrê xo yê azadî tewrê gerîlayan bîya. Sey ciwanêkê kurdî ez şîyêne û ameyêne HDPyî. La HDPyî semedo ke ma tewr mebê verê ma de astengîyî ronayî. Çunke HDP çarçewa sîyasî de têgêreno. Mi rê no bes nêbi coka ez ameya hetê gerîlayan.

2015 de terwbîyayîşê mi ra dima Botan de netîceya hêrişê hewayî de embazê mi kişta mi de şehîd bîyî û ez zî birîndar bîya. Ez sere de keyeyê xo rê keyeyanê ke verê bînaya HDPyî de ronişenê rê vana ke aya ke ma şehîd kena û bi barbarî hêrişê ma kena a dewleta ke şima şawitî verê HDPyî.

Ma sey gerîlayan zerrîya xo hîra kerde şima zî bikerê. Bi hezaran domanê şima esta. Dejê şarê kurdî hîs bikerê. O çax şima mana danê têkoşînê ma û pê ma sereberz benê. 

Dewleta tirke semedo ke vera gerîlayan bin kewena metodanê şerê taybetî ana ca. Mîyanê ciwanan de qestî ra madeyanê kondoxan vila kena, ajanîye û bêxlaqîye mîyanê kurdan de vila kena. Na heman dewlet a ke şima şawitî verê HDPyî. Ganî merdimî bi zanayîşî têbigêrê û pê şertê taynetî mexapîyê.

Ez pêro keyeyan ra wazena ke dewlete ra hesab bipersê, goş medê plananê ci. Aya ke wazena ma qir bikera dewlete bi xo ya. Ganî şima dewlete ra hesab bipersê. Keyeyê ke têgêrayîşê ma nêşinasnenê ganî zêdêr cigêrayîşî bikerê û keyeyanê ke bedel dayo ra bimusê.

Xeylêk dadîyê ke domanê înan dewaya azadîye ya kurdan de şehîd bîyî maruzê barbarîya dewleta tirke manenê. Dewleta tirke pê nê mesajî vana 'Ez wina şima qir biekra û ameyoxê şima çin bikera.' Ma çîyêkê winasênî qebul nêkenê. Çewî ma nêşawito koyan û çew nêeşkeno ma apey biaçarno zî. Rixmê pêro hêrişan zî ma milê xo nêrard wa û ma do nêarê. Ma nê koyan ra cîya nêbenê wa keyeyî ney bizanê.

Ez venga keyeyan dana ke goş medê xapînayîşê dewlete û pê tewrbîyayîşê ma sereberz bibê. Hêvî û waştişê ma no yo. Ciwanî ganî dewlete rê tewirê xo bimojnê, polîtîkayanê dewlete qebul mekerê û dezgehanê ci de ca megêrê. Eke cayêkê têkoşînî esto uca têgêrayîşê azadîya Kurdîstanî yo.''