Rojnameger Azîz Koyluoluyo ke 27ê çeleyî de qezaya Ranya ya  Silêmanî de hetê droneyê çekdarî yê dewleta tirke ra ame qetilkerdene, cenazaya ci Şehîdgehê Binarê Qendîlî de bi merasîmêkê qirseyî ameye definkerdene.

Endamê Komîteya Keyeyanê Şehîdan ê PKKyî yê Başûrê Kurdîstanî Wehab Ahmedî ke merasîmî de qisey kerd, vat: ''Ez şexsê Azîz Koyluogluyî de heme şehîdê têkoşînê azadîye yê Kurdîstanî yad kena  û  êyê ke rayîrê şehîdan de rayra şinê û têkoşîn kenê înan selam kena.''

Rojnameger Hewar Muhammedî zî ard ziwan ke dewleta tirke verê çimanê dinya de rojnamegeran qetil kena û vat: ''No zî mojneno ke ê senî vengê azadîye ra tersenê.  Tewr peynî embazê ma rojnameger Azîz Koyluoglu zî şehîd kerd. Azîz Koyluoglu kedkarêkê çapemenîye bi ke 25 serrî yo no kar kerdêne. Ma do sey xebatkaranê çapemenîya azade heta peynî peyê raştîye de şirê.  Îşxalkerî biwazê ma bêveng bikerê zî ma do tim bibê vengê  heqîqetî.''