Dewleta tirke binkewtişê Garê ra dima gefê vera Mexmûr, Şingal, Qendîl û Rojawanî zêdînayî. Roniştoxanê Kampa Şehîd Rûstem Cûdîyî ya Mexmûrî derheqê mesele de ANFyî rê qisey kerd.

Dayîke Xanime Gundikremo vat: ''Dewleta tirke her roje ma rê gefan wanena.  Ma talanê înan ra ameyî tîya la artêşa tirke zî peyê ma ra ameya. 20 serrî yo ma vera dewleta tirke ya barbare xo ver danê û ma do xo ver bidê.''

Selîm Şaxîyî vat: ''37 leşkerê înan Garê de kişîyayê coka înan o apey girewt. Semedo ke Mexmûr, Şingal û Garê herêmê stratejîk ê dewleta tirke wazena nê herêman îşxal bikera.''

Çalakîkerê grevê vêşanîye Xûrşîd Demîrî vat: ''Dewleta tirke Garê de esîrê xo kiştî. Amerîka, PDK û her kes zaneno ke Mexmûr, Şingal, Qendîl û Garê hedefê înan de yê. Tirkîya wazena şexsê PKKyî de kurdan qir bikera. Ma venga pêro kurdan danê ke seba azadîya Serekîye bixebitê û yewîya xo bîyarê ca. Wext wextê azadîye yo.''

Endamê Têgêrayîşê Ciwanan ê Mexmûrî Murad Roboskîyî vat: ''Tirkîya binkewtişê Garê ra semed hêrsbîyaye ya. Înan vatêne 'Ma do Mexmûr çin bikerê, Qendîl de alaya xo darde bikerê.' Ma gefanê înan ra nêtersenê. Hende merdimê ma şehîd bîyî la Mexmûr hema zî tîya de yo.Seba azadîya Rayber Apoyî destê ma ra çita bêro ma do bikerê û hetê gerîlayan de ca bigêrê.''

Endama Têgêrayîşê Ciwanan Selma Bozan zî vat: ''Nê gefê Erdoganî û dewleta tirke hêrsê binkewtişê Garê yê. Ma zanenê ke ê reşwêka tenge de yê. Ma pê pêro hêzê xo paştî danê gerîlayan.Erdogan çend gefan biwano zî ma do pê îradeyê Rayber Apoyî gefanê înan pûç bikerê.''